National Press Day hmang

National Press Day hmang
MJA Gen Hqrs leh IPR,P&S department huaihawtin, ram puma Chanchinbumite Ni – National Press Day 2025 chu Thawhtanni khan hman a ni. Press Day hi November 16 kha a ni a, kuminah Pathiannia a tlak avangin November 17 hian hman a ni.
Hmanpuitu IPRP&S secretary Betsy Zothanpari chuan, chanchinbumite chu ram tana rawngbawltu pawimawh tak an ni a. Sawrkar tha tichak tur leh mipui zirtir tura an dinhmun pawimawh zia hria a, thahnemngai taka an eizawnna kawngah theihtawp chhuah zel turin a fuih. Khawvel hmasawn zelah mi tam takin chanchinbu chu hriatna hnar rin tlak bera an ngaih pakhat a nih angin, an thuthar lakkhawm leh mipui a an puan leh dan thu ah fimkhur a, thuhnu dawn taka mipui hnena puang chhuak thin turin a chah bawk.
He hunah hian I&PR director hlui, Mizoram buai laia remna atana a hna kaltlanga hna a thawhna avanga tunhnaia Dr. Bhupen Hazarika National Award 2025 hlan LR Sailo leh, MJA member, rambuai laia journalism kaihhnawiha doctoral degree sualchhuaktu Dr Lalnunkimi Colney hnenah I&PR department hian chawimawina thilpek an hlan a ni.
National Press Day 2025 thupui – “The Role of Print Media in the Digital Age” tih hmangin I&PR deputy director Pratap Chhetri chuan digital khawvela kan awm tawh laia chanchinbu dam khawchhuah theih dan leh a dinhmun zel tur a sawi a ni.
National Press Day hi 1966 November 16-a din, ram pum huapa press mite thlungkhawmtu Press Council of India din ni pualin kumtin hman thin a ni a. Kumtin thupui neiin, press mite than zel dan tur leh hmasawnna tur, ram rawngbawlna kawnga media-ten hlawk zawka tha an thawh theih dan tur zirhona atan hman thin a ni.