ILP endik kawngah tan la turin police an inchah

ILP endik kawngah tan
la turin police an inchah
Aizawl district huamchhunga police station ho chu inner line permit endik kawngah tan la lehzual turin Aizawl SP Zosangliana chuan a chah.
Thawhtanni khan Aizawl district-a pawikhawihna thleng, police-in an bawhzui china hma lak a nih dan leh an thlen chin thlirletin a kaihhnawih police officer-te an thukhawm a. Aizawl SP chuan, nasa lehzuala ILP endik lama hma lak a pawimawh tih a sawi a. Sairang thleng rel a rawn luh tak avangin Mizoram pawn atanga khualzin leh inhlawh tura rawn lut an pung a, an la pun belh zel tura a ngaih niin, heng thil avanga ILP endik leh khauh zawka kenkawh a pawimawh tih a sawi. Sairang Rel Station-a police duty indah mek tha tichak turin dahbelh tum a ni tih a sawi bawk.
He thutkhawma tarlan danin, kuminah Aizawl district-a police station hrang hrangin ILP checking an kalpui thinah ILP nei loa Mizorama lo lut leh ILP dik loa khawsa hnamdang 793 man an ni tawh.
Kuminah November 15 thleng khan Aizawl DEF hnuaia police station hrang hrangah thubuai 1593 ziahluh niin, heng zinga thubuai 897 (56%) chu chinfel a ni tawh. Thubuai 431-ah hnuchhui mek niin chhuichhuah loh thubuai 264 a awm. Thubuai ziahluh atanga zaa 66 hi rukruk leh in rawk thubuai a ni.
Kumina thubuai ziahluh, court-in a chinfel tawh atanga zaa 90-ah dan bawhchhetute thiamloh chantir an ni. Bawngkawn Police Station-ah thubuai ziahluh a tam ber a, kuminah thubuai 578 ziahluh a ni tawh.
Kum kal mekah Aizawl district-ah thubuai liantham zingah tualthah thubuai 9 ziahluh a ni a, chhuichhuah vek an ni. Naupang kum tlinglo pawngsual leh hurherhna lam hawia pawikhawih thubuai POCSO Act hnuaiah 60 ziahluh a ni. Ruihhlo zuartu leh ruihhlo engemawzat mana thubuai siam a ni a. ND&PS Act hnuaiah thubuai 30 awm tawhin dan bawhchhia mi 28 man an ni tawh.