Eizawng rual mipa chawmhlawm kan ngah lutuk hian economy a tichhe : – Chief minister

On Dec 13, 2025 2 0

Mizo mipa thalai, eizawng rual chawmhlawm kan ngah lutuk chuan state economy a tichhe thei a, siamtha turin tanrual a ngai tih chief minister Lalduhoma chuan a sawi.
Aizawl Munical huamchhunga ZPM Zonu chuan Zirtawpni khan conference an nei a. Hmanpuitu chief minister chuan, kan ramah luah loh, hman tanglai loh ram ruak a tam a, hmang tangkai tur mihring kan mamawh a, pian pun kan ngai a, nupa kara nau piang kan tam a ngai tih a sawi.
“Hmeichhia 1000 zelah mipa 1066 kan awm a, mipa kan piang tlem a ni loa, kan thi nasa a, ruihhlo vang a ni. Mipa puitling kan tlem chuan kawng hrang hrangin assimilation a thlen thei. Mipa leh hmeichhia hi inbuktawk tura Pathian siam kan ni a, kan inbuk tawk loh chuan society a tibuai thei. Hei hi chhungkaw tinin kan buaipui a ngai a, kan vaia kan vei a ngai. Kum 2047-ah state changkang pawl nih kan tum a, GSDP 1% tal thawh ve thei nih kan tum. Home leh khawlaiah mipa thalai eizawng thei rual chawmhlawm ngai kan ngah lutuk hian economy a tichhe thei a, hemi venna leh a siamthatna lamah tangrual ang u,” a ti.
ZPM chuan hmeichhiate an ngaipawimawh a, gender budget an siam a, hmeichhe puala budget dah hmasa ber an ni tih chief minister hian a sawi a. Village council leh local council-ah ZPM atangin hmeichhe candidate thahnem tak an tling a, engemawzat chairman/ president an ni tih a sawi. Lunglei Municipal Council-ah ZPM an solid a, reserve seat 4 bakah general seat 2 hmeichhiaten an luah mek, tiin, AMC-ah ZPM-in reserve seat 5 an luah bawk a. ZPM sawrkar chu hmeichhe cabinet minister nei hmasa ber an ni a, hmeichhe MLA nei tam ber an ni bawk tih a sawi a ni.
Hmeichhiaten an zahawmna leh an inhumhimna dan hrang hrang hrechianga hmang tangkai turin Lalduhoma hian a chah a. Hleilenna avanga harsatna chu tawngpawng sepui ruah tuar ngawt loin, district tinah hmeichhe tanpui ngaite tan One Stop Center a awm bakah hmeichhia leh naupang harsatna tawkte tan help line no. 1098 leh puitling tan help line no. 181 biakpawh theih reng a ni, tiin, sawrkar laipuiin hmeichhiate tana hamthatna awm hrang hrangte hmang tangkai turin a chah bawk.