MUHCS-ah sawrkarin NGHAM be tawh loin a malin a dawr mek

Mizoram sawrkarin health care scheme thar a duan chungchangah private hospital leh kohhran enkawl damdawi in ho intelkhawmna – Non-Government Hospital Association of Mizoram (NGHAM) chu sawrkar ang chuan biak an tum tawh loa, a mala dawr leh inrem pui tur erawh an nei hnai tih Health minister Lalrinpuii chuan a sawi.
Health & Family Welfare minister hian thuthar thehdarhtute zawhna chhangin, MUHCS kaihhnawihah private damdawi in chu a malin an indawr tawh a. Tunah pawh Aizawla private hospital inrempui tur an nei a, tunkar chhunga tihfel hman an beisei tih a sawi a ni.
Hetihrual hian, nunna chan hlauhawm, thih leh dam inkara dinnaah MUHCS zawm lo (non empanel hospital) pawh pan theih a ni a, empanel hospital pan hmasak kher a ngai loa, darkar 48 ralhma in online tala MUHCS-a inhriattir a ngai thung tih a sawi a ni.
MUHCS zawm lo damdawi ina luh hian, bill lehnaah sawrkarin Medical Reimbursement Rules a neih sa ang hman a ni tih a sawi a. MUHCS zawm damdawi in erawh, sawrkar emaw private damdawi in pawh nise, bill hi an ni lam hlawk ve theih tura ruahman sak niin, hei hi an thlir nawn leh thin a, an hloh dawn a nih chuan rate chungchangah sawrkar chuan siamrem a inhuam reng tih a sawi a ni.
Sawrkar kum thar lamah MUHCS-a inziaklut hi pung hluai ta pawh nise, sumah sawrkarin a inring lawk tawk tih Health minister hian a sawi a. “Tuna kan ruahman dan hi Covid laia damdawi ina an tam lai ber ang kha a ni,” a ti.
Minister sawi danin, kumin April 1 atanga tun thlengin MUHCS hnuaiah mi 59602 enkawl an ni tawh a. Hemi atan hian sawrkarin cheng vaibelchhe 100.529 a seng tawh.
“Hemi chungchanga ka lawmna deuh chu, damlo zawng zawng zinga zaa 68.56 hi sawrkar damdawi ina enkawl an ni a, chutih laiin sawrkar damdawi ina damlo tana sawrkar senso chu zaa 43.47 chauh a ni thung,” a ti a. Sawrkar damdawi in hrang hrang an tih changtlun chuan awmzia a nei thui hle tih a sawi a ni.
Social Welfare minister ni bawk Lalrinpuii chuan sawrkarin ruang phurh man a tum hnu, 2024 September 1 atanga 2025 December 16 thleng khan ruang 1680 phurhna atan Rs. 1,75,85,602 pekchhuah a ni tawh tih a sawi.
“Ruang phurh scheme hi sawrkarin Mizoram chhunga mahni chenna hmun ni loa thi chhungte a puihna atana duan a ni a. Ruang phurh bill thei tur chuan, mi an thihna hmun atanga ruang dahna hmun hi km.20 aia hla tal a nih a ngai. Lirthei hman man hi km. khatah Rs.40 a chhut a ni,” a ti.
Mamawhtute tan buaipui a awlsam zawknan ‘Ruangphurh app’ ruahman chu an peihfel tep tawh tih a sawi a. Kumthar lam atang chuan online-in awlsam taka bill thehluh theih a ni tawh dawn tih a sawi a ni.