Ke a Philippines kal chuak rang ber

Ke a Philippines kal chuak rang ber
Filipino tlanglawn mi Lito De Veterbo chuan thla nga tling lo deuh chhungin ke ngawt Philippines a fang chhuak hman a, Guinness World Record a siam. Lito De Veterbo ian ni 147 leh darkar 1, minute 39 leh second 53 chhungin Philippines hi a fang chhuak hman a ni.
Lito hian February ni 9, 2025-ah a zinkawng zawh tanin, July ni 6, 2025 khan a zin kawng tawp a thleng a, tun weekend kalta khan Guinness World Records atangin a record siam pawmpuina a dawng ta a ni. Lito hian March 2024-ah record siam a tum thu hi Guinness-ah a lo thlen hmasa tawh a, thla 10 hnuah record siam tumin a fehchhuak ta a ni.
Lito chuan, “Thla 10 ka inbuatsaih chhung hian training hautak ka bei a. Thui tak tak ke a kal bakah tlang lawn te leh hetiang record siam tura pawimawh te chu ka theih ang angin ka lo ti lawk chhin nasa hle a ni. Taksa lam inbuatsaihna mai piahlamah rilru inbuatsaih a ngai a, sum leh pai lam pawh inbuatsaih tel a ngai,” a ti.
Lito hian he record siam tuma beihna chhan chu environmental awareness mipuiin an neih that lehzual theihna a nih beiseina nena a tih niin a sawi a, a zinkawngah hian a tirah a chhungkhar laina hnai leh a thiantha tlem azawngin thui vak lo thlahin an kalpui tih loh chu thurualpui dang a nei lo. A backpack akin, tuipui paina hmannawn theih litre khat dawng, tui tihthianghlimna, GPS tracker pathum, thawmhnaw hakthlak pair thum leh first aid kit te a backpack-ah hian a ak.
Thla nga ke a kal ngat ngat chhung hian pheikhawk bun thum a bun chhe hman a, a phur a rih loh zawk nan pheikhawk hi chu a zinkawngah a leichawp a, a chhia pawh a paih nghal zel a. “Zing dar 9 velah ka tan tlangpui a, dar 6-7 vela tan chang pawh ka nei a, tlailam dar 4-5 thleng ka kal tlangpui,” a ti. Nikhata a kal tawi ber tumin km 7 a kal a, a kal thui ber tumin km 28 a kal ve thung a, chawhrualin, nitin km 18 vel zel kal ang a ni.
Vanneihthlak takin a zin chhung zawngin han nawmsam loh pawh a nei lo a, chu chu a vanneihna leh record a siam theih phahna chhan pakhat niin a sawi a. Kuminah kum 55 a tling a, hetiang kumah tawh hetiang thil a la ti thei chu midangte chophurtu a nih theih ngei a inbeisei bawk a ni.