BJP Mizoram-in VB-G-RAM-G sawifiah

BJP Mizoram-in
VB-G-RAM-G sawifiah
BJP Mizoram State hruaitute chuan nimin khan thuthar thehdarhtute kawmin, central sorkar-in ni 125 inhlawhna VB-G-RAM-G a duan thar chungchanga Mizoram mipuite hriat tur pawimawh hrang hrang an sawifiah.
BJP hruaitute chuan, tunhmaa MGNREGA hnuaia ni 100 inhlawhna kalpui thin chu, tuna scheme thar ‘VB-G-RAM-G’ (Viksit Bharat—Guarantee for Rozgar and Ajeevika Mission (Gramin) hian nikum kum tawp December 15, 2025 khan thlak a ni, an ti a. He dan tharah hi chuan ni 100 mai ni lovin, ni 125 inhlawhna, hnathawh theihna tur duan a ni ta a, mirethei tam takin he scheme kal tlang hian inhlawhna tha tak an hmu thei dawn a ni, an ti.
“Tuna VB-G-RAM-G scheme chungchangah hian, mi thenkhat ten, scheme zawng zawng hi Central-in a ruahman vek dawn tih dawt thuthang an theh darh a, nimahsela Gram Panchayat leh Gram Sabha te’n an khua leh tui hmasawnna tur chu anmahni ngeiin an ruahman anga, khaw chhungah hna eng ang nge thawh tur tih pawh anmahni’n an rel thei dawn a, ruahmanna siam chungchangah a mawhphurhtu lian tak chu Village Council (VC) – te an ni dawn a ni,” an ti bawk.
VB-G-RAM-G Scheme hnuaiah hian, hna thawh tur zatve (50%) aia tam chu Gram Panchayat (VC/VEC) kaltlangin direct-in thawh theih a ni dawn a. Hei hian khawchhung mite tan hna a siam thei ang a, a takin thingtlang khua ten hmasawnna an hmu thei dawn a ni. Gram Sabha leh Gram Panchayat ten a an khua/veng tana hmasawnna tur ruahmanna an siam turah ngaihpawimawh tak tak pali an thlang a, chungte chu:- tui dahkhawlna (water conservation), hmasawnna hna thawhna tur siamte, (infrastructure creation), eizawnna tihchakna (livelihood-oriented works), leh chhiat rupna lo thlen thulha ruahmanna (disaster management) lo siam te hi a Focus tur pawimawh tak a ni. Tin, kan sawi tak hnuai atang hian, dil (ponds) laih te, tui check dams siam te, tui danna (stop dams) siamte, sikul leh damdawi in (hospitals) sakte, Anganwadi sakte, kawngpui siamte, tui luankawr (drains) siamte, Shed tur sak leh chhungkaw retheite leh hmeichhia te tan Self Help Group (SHG) member-te sum lakluhna tihpunna tur hna hrang hrang ruahman te pawh telh a ni bawk a, a fun kim em em a ni, an ti.
He scheme thar hian hlo thlawh leh buh seng hun laia lo neitu te tan remchanna a siam sak tha em em a, kum khatah ni 125 hna an thawh theih ngeina turin (guarantee) a la awm reng a, thingtlang lam lo nei mite tan kum khatah State Sorkarin ni 60 thleng hna chawlhtir theihna thuneihna an nei bawk a ni. Hei hi loneitute tan a tha em em a, ruahmanna tha tak hnuaiah thlamuang takin hna an thawk thei dawn a. He Scheme thar leh Hindu Sakhua hian inzawmna a nei lo, tiin BJP Mizoram hruaitute chuan an sawi a ni.