Chhiatna thlen thulha hmalak dan tur sawi ho

Chhiatna thlen thulha hmalak dan tur sawi ho
Nimin khan Mizoram Legislative Assembly Conference Hall-ah National Disaster Management Authority leh Disaster Management & Rehabilitation Department tangkawp buatsaihin, Mizorama chhiatrupna thleng thei hrang hrang laka chhanchhuah leh chhawmdawl hna sawt leh awmze nei zawka kalpui dan tur sawi hona, ‘Table Top Exercise’ neih a ni.
He hun hi Udit Prakash Rai, Commissioner & Secretary, DM&R chuan kaihruaiin, Brig. Ravinder Gurung (Rtd.), Sr. Consultant, NDMA chuan ‘Table Top Exercise’ awmzia leh a pawimawhna a sawifiah a. He hunah hian district hrang hranga District Disaster Management Authority, Mizoram Police, Incident Response Team leh Nodal Department aiawhte an tel a ni.
January ni 15-a State Level Mock Exercise kalpuina tura Table Top Exercise neihah hian mithiam ten presentation hrang hrang an pe a ni.
He huna tarlan danin chhiatrupna thlen palha che chhuak thei tur, State Disaster Response Force chu Mizoram Police hnuaia Armed Battalion 8 atangin mi 546 an awm a. Aapda Mitra Scheme 2022 -23 kalpuina hnuaiah district 5 atangin mi 100 theuh hnenah training pek an ni a. Yuva Aapda Mitra 2024 – 26 kalpui mekah mi 419 traning pek ni tawhin NCC, NSS, NYK leh Bharat Scout & Guide hnuaia a tul anga che chhuak thei tur thalai mi 1130 ziah luh tawh a ni a. Sairang leh Tlabungah tawmhimna ‘Safe Shelter’ pahnih sak a ni tawh bawk.
Brig. Ravinder Gurung (Retd.), Sr. Consultant, NDMA chuan, kum 10 chhung khan Aizawl leh a chhehvel km 300 bial chhungah lirnghing magnitude 4 aia na, tum 520 chhinchhiah a nih thu a sawi a. He mi chhung hian kum 2020 kha lirnghing tam ber kum a nih thu sawiin tum 75 chhinchhiah a nih thu a sawi.