Kawlri Tlanga Heritage Centre sak mek enfiah

Kawlri Tlanga Heritage
Centre sak mek enfiah
Sawrkar laipui Ministry of Development of North Eastern Region (DoNER) secretary Chanchal Kumar chuan Zirtawpni khan Serchhip tlawhin Kawlri Tlanga Cultural Heritage Centre sak mek a tlawh.
Kawlri Tlanga Cultural Heritage Centre sak mek hi Serchhip bialtu MLA, chief minister Lalduhoma hmalaknaa sak niin, North Eastern Council hnuaia sum hmuh hmanga sak a ni. September 2024 khan kuthhlak tanin kumin kum bul lama zawh hman tura duan a ni. He project atana sum dah hi cheng vaibelchhe 4.31 a ni a, PWD hnuaiah Excell Consultancy Services-in a thawk. Tun thlengin zaah 65 thawh zawh tawh a ni.
DoNER secretary hian a hmunhma fangin contractor chu a rang thei ang bera thawk zo turin a hrilh a. Ministry atangin funding-ah harsatna a awm lo tih a sawi. Tangkai zawka hman a nih theihnan leh mipui pawhin an hlut zual theihnan trekking route siam dan tur ruahman tel nise, tiin a rawt.
Kawlri Tlang hi (Mary Winchester) Zoluti laklet lehna hmun niin, Serchhip Heritage Society chuan Mizo history vawnnunna atan, zinmite hipna leh a hmunhmaa khuanu thil siam thing leh mau vawnhimna ni fawma chei a nih theihnan hma an la a. Bialtu MLA hmalaknain hna hi kalpui a ni ta a ni. A bul lawkah Chawngpuii Khawthlir leh Pastor Chhawna Tawngtaina In siam a ni tawh bawk.