Manipur-a Naga-ten Kuki hel lakah FIR thehlut

Manipur-a Naga-ten Kuki hel lakah FIR thehlut
Manipur-a Naga tribal chenna khaw pakhat thuneitute chuan Kuki National Front (KNF)-in thihna thlen tura tihthaih leh an khuaa thil suasama puhin police-ah thubuai an thehlut.
Kangpokpi district-a Ireng Naga Village Authority hian Nilainia FIR an thehluhah hian Pathianni zan dar 11:30 velah KNF/UPF (United People’s Front) helte hi an khuaah lutin bus stop-a a chung zar telin vantlang thil an tichhia niin an thlen.
Helho hian ‘an khuaa hriatrengna lung an phuna thuziak chu ‘Kukiland’ tih leh ‘Stay Away’ tih thuin an ziah hnan’ nia sawiin hei hi dan bawhchhiatna, invauna leh intihthaihna ni ngeia an ngaih thu khaw hotute hian an ziak.
UPF hi sorkar laipui, state sorkar leh hel pawl hrang hrang telna pawl pahnihten inbei lo tura inremna, suspension of operations (SoO) agreement ziaktu zingah an tel a. KNF hi UPF peng an ni bawk.
“January 12, 2026 khan khaw miten muanawm taka kawng an dan hnuah Tiger Kipgen (Thangboi/Haogenthang Kipgen), KNF commander nia hriatin chhun dar 12:05-ah WhatsApp leh mobile phone-a village chairman biain silaia kah leh khua halah a vau bawk,” tiin Ireng Naga Village Authority hian FIR-ah hian an ziak bawk.
“Hemi ni vek chawhnu dar 2.01-ah ralthuam nen mi 30-40 velin khaw lam an rawn pan a, mi an tichiaiin an tihlau hle a ni,” an ti a. Heng chetna hi SoO agreement bawhchhiatna niin an sawi bawk.
SoO inremna hi kum 2008-ah a vawi khat nan ziah a ni a. Kum tin joint monitoring group-in ennawnin kalpui dan tur an ngaihtuah thin a. Inremna angah chuan helho hi an camp-ah awm vekin an ralthuamte chu a dahna hmunah kalh hnan tur a ni a, tuna inremna hman mek hi September, 2025-a kum khat atana pawh sei kha a ni.