ZPM a chhuk zawng hlirin an kal – MNF sr vice president

ZPM chu a tlahniam leh a chhuk zawng hlirin an kal a, MNF chu a chho zawng leh hmasawnna lam panin an kal zel thung tih MNF senior vice president Dr R Lalthangliana chuan a sawi.
Dampa bial khua a tlawh kualnaah MLA Dr R Lalthangliana chuan, tuna sawrkar mek ZPM chu MLA inthlanpui campaign lai khan an rilrua awm, tha tura an ngaih apiang thil tam tak mipui an tiam a, hneh takin an tling ta a. Mahse, vawikhat mah MLA leh minister la ni ngai reng reng lote an han minister a, an beisei leh rin angin thil a awm thei leh si loa, a ngaihna an hriat loh avangin an sawi ang khan an kal leh thei ta loa, sawi loh ang hlira an awm avangin mipuiin anmahniah rinna an nghat zo ta meuh lo tih a sawi.
“An sawrkar vanglai takin inthlan apiangah an tla zawih zawih zel a, a tlahniam leh chhuk zawng hlirin an kal. MNF chu a chho zawng leh hmasawnna lam panin kan kal zel thung a, MNF-in rorelna a chan lai khan tihdikloh engemawzat kan nei ang, mihring chu insiamtha a hmasawn zel tur kan ni a, a tha lo lai kalsanin hmalam pan zel tur kan ni,” a ti.
Dampa bialtu MLA a nih takah chuan party pakhat chauh MLA ni lo, mipui MLA, mi zawng zawng ta a ni tawh tih a sawi a. An bial chu kuthnathawka eizawng deuh vek an ni a, eng hi enge an eizawnna atan tha ber tur leh inchawikanna atan tha ber ang tih ngaihtuah ho zel a ni dawn tih a sawi a ni.
MLA hian West Phaileng Primary Health Centre a tlawh nghal a, thawktuten lo dawngsawngin hospital tul leh mamawh an lo thlen. Theih ang angin puih a inhuam tih a sawi a. Hunpui vuakvetah hospital-in duty an indaihloh avanga nurse pakhat an lak belh hlawh chu a peksak a, hospital poor fund atan sumfai a hlan bawk.