Point 9 in Arsenal an sang fal

Inrinni zan khan English Premier League 2025-26 khelh chhunzawm a ni a, Table-a hmahruaitu Arsenal chuan an mualah awlsam takin hnehna an chang. Arsenal chak laiin an elpui lian Aston Villa an chak zo lo. Villa an chak zawh loh vangin Arsenal in point 9 laiin hma an hruai fal a, champion tumin hma lam an pan zel.
Arsenal 3-0 Sunderland
Table chung ber luahtu Arsenal hian EPL season kal meka an hneh zawh lo tlemte zinga mi Sunderland hi Emirates Stadium-ah an mikhual a, Mimuala an hneh zawh loh Sunderland lakah hian 3-0 ngawtin hnehna an chang a, point thum hmu tak an hmu. Arsenal tan hian Martin Zudimendi leh Viktor Gyokeres ten goal an thun a, an hmahruaina tizau leh zual turin an mualah ngei hnehna an chang.
Emirates Stadium-a lenglut Sunderland in bul an tan tha a, hun tha nei hmasa in goal an thun hmasa teuh hle. Inkhel tan tir lamah Arsenal si nghak David Raya chetsual vangin goal thun theihna hun remchang an nei. Goal an thun ngei tura ngaih a nih laiin Arsenal defender ten fuh leh vanneihthlak ang reng takin an lo dang hman hlauh a, hma takah goal chuah lovin Arsenal an him hram.
Goal an chhuah teuh viau hnuin Arsenal an insiamtha a, awmze nei zawkin an mikhualte an nawr let. Fuh taka ball an inpek chuan hnuin midfielder hmuhnawm Martin Zubimendi chuan a tawp a khar tha a, box pawn atangin lei hrulah fuh zetin a pet goal a, chawlhlawk dawn hnaih minute 42-naah hmahruaina goal a thun. Zubimendi goal thun hmang hian 1-0 a hmahruai chungin Mikel Arteta enkawl Arsenal in hma an hruai.
Chawlhlawk hnu lamah inkhel a hmuhnawm chhunzawm a, Arsenal an vannei chhunzawm zel. Black Cats hian fuh tak nawrin, hlauhawm siam thin mah se goal chhuah em lovin Arsenal an him hram hram zel. Goal chhuah teuh viau mah se Arsenal si che fuh zawkah an tang nawn leh zawk. Goal thun mamawh tak Viktor Gyokeres chuan mual chhung a luh atanga minute hnu lek; minute 66-naah hnaite atanga goal thunin an hmahruaina a tizau. EPL-a goal thun mamawh Gyokeres-a’n goal a thun hian manager leh a team-mate te a tihlim viau. An mualah si hnih faia hma an hruai vangin Gunners an phur a, an inringtawk viau bawk.
Inkhel hmuhnawm takah goal lu a awm belh theih loh reng hnuin Arsenal bawkin a tawp an khar fuh a, goal an thun zui leh. Gunners hian hun pek belhah fuh zetin an mikhualte an nawr let a, Gabriel Matinelli chuan tha takin a khalh tlang. Martinelli hian mahni hmasial lo takin Viktor Gyokeres tan a siam sak. Gyokeres hian Martinelli siamsak tha zet hi goal ruakah awlsam takin a pet goal a, minute 90+3-ah an goal thumna thunin, an chakna a nem nghet. Gyokeres goal thun hnuin goal dang a luh belh thei tawh lova, Arsenal chuan an mualah awlsam takin hnehna an chang a, point thum an hmuh belh.
Villa an chak zo lo
Arsenal tantuten inrinni zan hian pathumna awm mek Aston Villa khingpui AFC Bournemouth an tan hle. |an an nih ang ngeiin Bournemouth hian Aston Villa hi 1-1 in an hnehtawkpui a, an mualah point khat hlu tak an hmu. An tan hna tha an thawh ang bawkin Arsenal tan hna tha an thawk ve bawk.
Vitality Stadium-a lenglut Aston Villa in bul an tan tha a, goal thun hmasa zawkah an tang. Villa tan hian Morgan Rogers chuan minute 22-naah hmahruaina goal a thun. Goal thun hmasa zawk an hnih vangin an phur a, mikhual an nihna hmunah point thum hmuh ngei tumin tan an khawh zui nasa hle. Mualneitu Bournemouth pawhin an si phurh sut tum viau mah se an hlawh tling mai thei lova, hnufual zawk ni chungin chawlhlawk an hmang.
Chawlhlawk hnu lamah Bournemouth an khel tha leh zual a, goal an thun ta thuai. Minute 55-na lekah Rayan Rocha chuan goal thunin an si phurh a sut. Goal khat ve ve an thun hnuin inkhel a hmuhnawm zui viau a, hnehna chan ngei tumin team hnih ten tan an khawh nasa dun hle. Goal thun tum viau mah se hun tawp thlengin goal dang a luh belh thei lova, AFC Bournemouth leh an mikhual Aston Villa te chu 1-1 in an inhnehtawk zui ta a ni.
Bournemouth lakah an chak zawh loh vangin Aston Villa leh table chung ber luahtu Arsenal te inkar a zau leh zual a, an inkarah point 9 zet a tla zep tawh. Villa leh Arsenal karah hian point 4 lek a tla zep hman tawh kha a ni a. An match hnuhnung pahnihah hnehna an chan zawh loh ve ve vangin point an hloh zawn a. Hmahruaitu Arsenal nen an inkar a zau leh ta duai. Villa hian pathumna luah chhunzawm bawk mah se Manchester United leh Chelsea ten an um chak viau a, an dinhmun a him lo sawt hle.