Antonelli F1 chak vawi khatna!

Antonelli F1 chak vawi khatna!
Mercedes one-two finish kan hmuh nawn leh tum Pathianni Chinese Grand Prix-ah Kimi Antonelli chuan a career-a a vawi khatna atan Formula One hnehna a sualchhuak ve ta nge nge e.
Kum 19 mi Italian driver hi he sport history-a race winner ni thei naupangber dawttu niin, kum 2016-a rawlthar kum 18 mi ni chunga Red Bull car vuan chunga hnehna chang four-times world champion Max Verstappen chu F1 grand prix-a chak thei naupang ber a ni.
Mercedes-AMG Petronas Formula One Team one-two finish kan thlirliam tuma hnehtu Antonelli kha kum 2006 Malaysia-a chak Giancarlo Fisichella of Renault hnu lama Italian driver zinga F1 race hnehna chang leh thei hmasaber a ni nghal bawk.
Chequered flag a tlanpelh ruala radio kaltlanga Kimi Antonelli thusawi kan hriat theih hmasakber chu: “Thank you everyone. Thank you so much. Ka duhthusam thinte hlenchhuak tura min puitute in ni. Sawi tur pawh ka hre lo. Dawt sawi lo chuan ka tah a chhuak,” tiin a team-te chungah lawmthu a sawi a, lawmman semna dawhsanah a mittui a dang zo lo.
Formula One chief executive Stefano Domenicali chu pole position luah chunga full grand prix bul tan thei naupang ber leh a chipui ni bawk Antonelli lawmpuitu langsar hmasa niin, podium-a driver pathum an din laia Italian national anthem an chhuah lai pawhin chhuang taka a chipui lam a hawi vah lai hmuh tur a awm!
Shanghai International Circuit-a pahnihna chu Antonelli-a championship-leading teammate George Russell niin, a hma chiah Australian opener-ah pawh Mercedes hi an lo one-two tawh a, grand prix vawi hniha Russell leh Antonelli-te one-two finish zawnna a ni.
Tuntum Inrinni sprint race hnehtu Russell bawk kha Pathianni intlansiak tak zawkah pawh rinkai ber ni leh mah se Saturday sprint-a pangana Antonelli a ngam ta lo a; championship standing-ah point 11-a Russell-a hmahruai falna kha point liah a tlahniam ta a ni.
Pathumnaah Russell-a chipui Briton Lewis Hamilton kan hmu a; tun kha nikuma Italian team a zawm hnua Ferrari car khalh chunga seven-times world champion-in podium a lawn vawi khatna a nih bakah Las Vegas 2024 hnu lama F1 lawman sawmna dawhsan a chuankai leh tum khatna a ni tel nghal.
Palinaah Hamilton-a teammate Charles Leclerc thlengin, Scuderia Ferrari driver pahnih hi podium lawn inchuhin an innawr na viau nghe nghe.
Haas khalhtu Oliver Bearman chu pangana niin, a hnungah Alpine driver Pierre Gasly leh Racing Bulls mi chhawr Liam Lawson-te’n an dawt.
Pariatna chu Red Bull driver Isack Hadjar niin, a teammate Verstappen erawh a tlanchhuak zo lo thung.
Carlos Sainz of Williams chu pakuanaah kan hmu a; nikuma Alpine tana point thawkchhuak zo lo Franco Colapinto chuan a tawpa tawpah Formula One point a hmu ve ta hram a, 10-na a ni.
McLaren reigning world champion Lando Norris leh a teammate Oscar Piastri-te chu an car-in harsatna a tawh avangin an tlanchhuak thei lo ve ve.
Hun rei tak F1 lawmman semna dawhsan a chuankai zawh loh hnua pathumna dinhmun a luah leh hnuah Hamilton chuan hun rei tak hnua race phurawm tak a tawnbuak leh tum khatna a nih thu a sawi.
Indona kal mek avanga Middle East-a tlan tur race pahnih thulh avanga thla khat zet an chawlh hmain 27-29 March race weekend atan F1 team-te Japan-ah an fuankhawm leh phawt ang a; Suzuka tlankawnga high-speed corner-te chu dan thar hnuaia car duantharte fiahna pawimawh a ni ang.