Nupui pasal inneih dawnin in-test hmasak inzirtir a tul – Health minister

Nupui pasal inneih dawnin
in-test hmasak inzirtir a tul
– Health minister
Nupui pasal inneih dawnin, HIV kai leh kai loh inendik hmasak chu kohhran-in a member-te a zirtir a tul tawh tih Health & Family Welfare minister Lalrinpuii chuan a sawi.
Mizoram State AIDS Control Society pisapui tur, State Resource Centre for HIV/AIDS building chu Thawhlehni khan Health minister hian a hawng a. Kum 20 chhungin MSACS chu vawi nga an insawn kual hman a, awmna mumal nei mang loa awm chang pawh a awm a, mahni puala building an nei ta chu a lawmpui tih a sawi. Hetianga building tha sak a nih lai hian, Mizoram hmun thenkhatah hriselna lama inenkawlna hmun building tha tawk lo awm chu pawi a tih thu a sawi bawk.
HIV bika Mizoram dinhmun chu a enkawltu minister tan pawha zahthlak a nih avangin, uar lehzualin kohhran-ten hma lakpui turin a ngen tih Lalrinpuii hian a sawi. “Kohhran tangrual hian nupui pasal neih hmaa HIV kai leh kai loh in test pawimawhna kohhran mipui min zirtir ula, sawrkar anga a remchan loh na lai a awm thin avangin, kohhran hian HIV darh zel tur do kawngah nasa takin hna a thawk thei a ni,” a ti.
MINECO ami MSACS pisapui hi kum 2022 daih tawha sak tura ruahman a ni a, funding agency chu North East Special Infrastructure Development Scheme – Other Than Roads Infrastructure (NESIDS-OTRI) niin cheng vaibelchhe 4 ruahman a ni. PWD hnuaiah a satu chu Lalnunmawia, Bungkawn Nursery Aizawl a ni a, kumin March thla tir khan an luahlut a ni.