US-Israel & Iran indona-ah Indian paruk thi tawh

US-Israel & Iran indona-ah Indian paruk thi tawh
Missile leh drone hmanga Saudi Arabia khawpui beihnaah Indian pakhat a thi tih external affairs ministry chuan Zirtawpni khan a sawi a, Asia khawthlang buainaah Indian paruk an thi ta a, mission-ten he biala Indian cheng maktaduai 10-te himna turin hma a a lak chhunzawm zel.
Riyadh-a Indian thi hi Nilainia mi kha a ni a, Saudi Arabia-a Indian thi hmasa ber a ni a. February 13 khan Oman-a industrial area beihnaah Indian pahnih an thi a, indona a chhuah nia sumdawng lawngte beihnaah tuipuia thawk pathum an thi bawk a, mi pakhat dang chin hriat loh a awm mek bawk.
“Ningani zan tlai tawh takah khan March 18-a Riyadh-a beihna thlengah Indian thih thu kan dawng a, thi chhungte kan tawrhpui tak zet a ni,” tiin external affairs ministry-a Secretary (Gulf) Aseem Mahajan-a chuan thuthar lakhawmtute hnenah a sawi.
Riyadh-a Indian embassy chuan a chhungte nen an inbe mek a, ruang hi a hma lama lak a nih theih nan tual chhung thuneitute nen an indawr tih Mahajan-a chuan a sawi a. Thu chiang hriat a la ni lo va, thil hre chiangte chuan Iran-in missile leh drone hmanga Riyadh-a a beih laia thi niin an sawi.
Asia khawthlang lama US-Israel tangdun leh Iran indona avang hian Arab ram eng emaw zata inbeihna thlengah Indian tam takin hliam an tuar tawh a, heng zingah hian Saudi Arabia, United Arab Emirates (UAE), Oman leh Iraq te pawh an tel.
Indian sorkar chuan tun hnaiah heng ram hruaitute hi biain Asia khawthlang ram hrang hranga cheng Indian maktaduai 10-te himna a ngai pawimawh hle a, an himna atana hma la turin a ngen nasa.
Mahajan-a chuan US tuialhthei phur lawng, Safesea Vishnu chu tun hnai khan Iraq-a Basra bula beih a ni a, teta tel ve Indian crew member 15 chu Saudi Arabia kaltlangin hruai haw an ni dawn tih a sawi a. Lawng beihnaah hian Indian pakhat a thi a, a ruang hi phurh haw a nih theih nan hmalak mek a nih thu a sawi a. February 28-a buaina chhuah tan atang khan Asia khawthlang atangin mi 3,00,000 vel India-ah an kir leh tawh tih a sawi bawk.
UAE-a airline-te chuan Zirtawpni khan India-ah thlawhna 90 an thlawhtir a, Oman leh Saudi Arabia atangin thlawhna a awm bawk a. Qatar boruak hawn then a nih hnuah Qatar Airways chuan ruahman lawk loh sumdawng thlawhna 10 a thlawhtir a, Kuwait-a Jazeera Airways chuan Saudi Arabia Al-Qaisumah international airport atangin India pan sumdawng thlawhna hmasa ber a thlawhtir bawk.
Indian thuneitute hian Kuwait, Bahrain leh Iraq boruak khar rengna hmuna Indian-te chu Saudi Arabia pana thlawhtheihna an lak theih nan an pui a ni.
Israel-a Indian-te chu thlawhtheihna hmanga Jordan ramri kaltlanga lut turin an pui bawk a, Iran-a Indian-te chuan thlawhtheihna hmang turin Armenia leh Azerbaijan ram an pan bawk.
Tuipuia thawk mi 24 awmna pawl pakhat, sumdawng lawng, MKD Vyom atanga mi 16 leh tuialhthei phur, Skylight atanga mi pariatte chuan Oman atangin India an pan tawh a ni.
External Affairs Ministry thupuangtu, Randhir Jaiswal-a chuan tun thlengin India mi 913-in Iran atangin Armenia leh Azerbaijan an pan tawh tih a sawi a, an zinga eng emaw zatin sumdawnna thlawhna hmangin an ram an pan zui leh tawh tih a sawi bawk.