Aizawl enkawl turin ZPM an tlak loh – Dr R Lalthangliana

Aizawl enkawl turin ZPM an tlak loh
– Dr R Lalthangliana
Aizawl khawpuia chengten sawrkar thaa an ngaih thinah ZPM sawrkar chu a hlawhchham fai vek a, Aizawl khawpui enkawl turin ZPM an tlak loh tih MNF hruaitu Dr R Lalthangliana chuan a sawi.
Ningania AMC inthlan atana an party tana a campaign-naah MNF senior vice president Dr.R.Lalthangliana chuan, Mizoramah AMC area-a chengte chu politics ngaihven lo pawha khawsa thei awm tamna hmun a ni a. Buhfai, ei leh bar, tui, electric, gas leh kawng a that a, ei bar kan hnianghnar chuan sawrkar thaah an ngai mai a, mipui an lungawi mai thin niin a sawi. Hengah hian ZPM sawrkar a hlawhchham fai vek nia sawiin, “Aizawl khawpui enkawl turin ZPM an tlak loh a, Aizawl khawpui hmangaih bertu MNF candidate-te thlangtling turin mipui khawngaih vote ka dil a ni,” a ti.
ZPM sawrkarah chief minister leh minister /MLA-ten an tawngkam thiam leh an sawi mam thiam vang ringawtin mipui chhiah pek leh bill a tlem phah lo, tiin, a tuartu leh hrechiangtu chu mipui an ni tih a sawi. ZPM sawrkar atang chiahin sum leng vak a tlem nia sawi bawkin, “Mimal leh chhungkaw sum lakluh a tlem a, chu chuan dawrte leh dawr lian, bazar leh sumdawng zawng zawng a nghawng. Ram pumah sum a vang ta em em a, hei hian kan hrawn mek sawrkar that loh zia a pholang,” a ti.
Chief minister berin thudik lo a sawi fo chuan, Mizote chu hnam dangin dawtsawi hmang hnamah min chhuah mai a hlauhawm tih MNF MLA Dr R Lalthangliana hian a sawi a. Chief minister chu Assembly House chhung leh pawnah pawh thudik chauh sawi thin tawh se a duh tih a sawi a ni.