Pro Volleyball hawnna: 2025 final Anastasia vs TNT
Pro Volleyball hawnna:
2025 final Anastasia vs TNT
Mizoram Rural Bank Pro Volleyball League hawn zanah nikum final-a inkhel Anastasia Electric Veng leh Thutak Nunpuitu Team an inhmachhawn dawn.
Inrinni khan Hawla Indoor Stadium Conference Hall, Republic Vengthlangah filmstar Lalruatsangi (Sangsangi)’n fixture tlangzarhin, musician Victor Vanlalhruaia’n handbook a tlangzarh bawk.
May ni 11, thawhtanni zanah LPS Arena, Falkland-ah khelh tan a ni dawn a, title humhim turin champion lai Anastasia an inlan nghal dawn a, TNT nen an inkhel ang.
May ni 24, 2025 khan final-ah Electric Veng club-in 26-24, 25-10, 21-25, 25-21 (3-1)-in Muanna Veng team an hneh a, a vawi hnih nan an champion.
Pro Volleyball hmasa ber 2016 khan final-ah Anastasia-in TNT an hneh tawh bawk a, 2023 champion Muanna Veng team-in hmabak hlen tur pawimawh tak nei tel chungin league bul an tan dawn a ni.
May ni 12, thawhlehni zanah nikuma semifinal lut ve ve Khawbel leh Tuichangral intawngin nilaini zanah Sihphir leh Chhinga Veng Spikers an inhmachhawn dawn a, round hmasa ber a zo ang.
Mipa team sarih inel tur zingah vawi thum champion tawh Hunthar an inlan hnuhnung ber dawn a, May 15, zirtawpni zanah Sihphir nen inkhelin bul an tan dawn a ni.
Hmeichhe lamah Pro Volleyball-a la tel ngai lo team pali inelin June 1, thawhtanniah league an tan ve thung dawn a, ni hmasa berah hian inkhel vawi hnih awmin an inlan kim nghal ang.
A hmasaah Eric Pautu Academy leh ITI Veng GSA, a hnuhnungah Chhinga Veng Spikers leh Tuichangral an inkhel dawn a, anni pahnih hi season tanna tournament final-ah intawng tawhin Tuichangral an chak a ni.
Zan dar 6-ah hmeichhe inkhel pakhat awmin a dang zawng zan dar 8-ah vek tan a ni dawn a; mipa lamah vawi khat an inkhelh kual hnua a sang pali tlangin June 10 leh 11-ah semifinal an khel ang.
Hmeichhe lamah a sang pahnihin final lut nghalin June ni 12-ah champion an inchuh dawn a, June ni 13-ah mipa final hmangin championship hmawrbawk a ni ang.
Mizoram Volleyball President Dr Lalmalsawma Nghaka chuan, pawlin sum nghah lo mah se hruaitute an inlungrual a, LPS Vision nen tha taka an thawh ho bawk avangin a vawi kua nan Pro Volleyball buatsaih a ni thei tur chu lawmawm a tih thu a sawi.
Mizoram volleyball zahawmna humhimpui tur leh tinung zel turin club tin a sawm nghal a, technical lam khawihtute hnenah a dik thei ang bera thutlukna an siam theih nan theihtawp chhuaha tan la leh zual turin a ngen bawk.