KAN RAM MAMAWH POLITICS DIK

H.Lalchhuanliana

Kan mithiamte sawi danin Politics tih hi Grik Tawng, Polis aTanga lak niin khawpui inrelbawlna tihna niin an sawi. Chuta Tanga lo kal zelin Politika tih a lo ni a, ram rorelna leh khawtlang inrelbawlna zawng zawng hi a huap vek a, chu chu Politics kan tih hi a ni an ti (a tawi zawngin).Mihring khawsak dan tur leh ram rorel dan tur hi Kristiante lehkhabu rintlak ber leh inghahna ber, Bible-ah hian kan hmu hnem hle bawk a, chu chu India danpui chhungah hian a leng vek bawk a ni. American Professor lar tak, Mikael Walzera phei chuan Bible hi sakhaw lehkhabu (religious book) mai ni lovin, ram inrelbawlna chanchin (political book) a ni bawk a lo ti hial a ni. Kan Lal Isua ngei pawh khan ram rorelna kha a vei hle a, Pharisai leh Sadukaite pawh an dik lohnaah khan huai takin a sawisel a, rorelna dik din turin a hrilh Thin a nih kha. Thlarau chhandamna piah lamah nitin khawsak honaa rorelna dik kha a nunpuiin a zirtir bawk a, amah Isua ngei kha ram leh khawtlang Thatna tura rawngbawltu, politician dik tak a ni an lo ti hial a ni. Hetiang hi politics Tobul anih si chuan kristiante tan chuan thianghlim taka ram rorelna ( politics) hi kalpui tur a ni anga, tuna kan kal mek dan aTanga insiam Tha tur kan ni tihna a ni ang.
Kan rama Political party ding hmasa ber, Mizo Union ( MU) kha kristian kan nih hnua lo piang a ni chung khan, min awptu Assam sawrkar (ring lo mite) politics kalphung kha an lo zui mai niin a lang. A chunga kan sawi tak Lal Isua duh dan leh Bible zirtirna mila MU party kha din lo ni se chuan kan politics hi tun aia a thianghlim deuh a rinawm e. MU party khan kan mizo lalte rorelna (chieftainship) tih tawpa District Council dina mipui rorelna hmanga ram hmasawnna kalpui kha an tum a ni a. Mizo lalte (chief) rorelna kalpui zel la duh pawlte nen khan tharum hial thawhin an chenna In te invawmsakin an huan thlaite thlengin an insuasam sak Thin niin an sawi. Khatiang boruak Tha lo tak avang khan kan sakhaw puithiam rual tam tak kha political party aTangin an inhnukdawk a, sakhaw rawngbawlna lamah an insawrbing ta niin an sawi bawk.
KO I THLAK TAWH ANG U:- Kan rama pol.party upa ber MU party din tirh boruak kan sawia, kum 80 hnuah hi chuan kalphung Tha lo lai hi chu thlak a hun tawh hle mai. Tunah chuan mithiam pawh kan ngah tawh a, Kohhran hruaitute thlenga ram rorelna Tha zawk duhna lo lian zel hi a lawmawm hle a ni. Kohhran mipuite hnenah ram rorelna dik leh Tha zawk kawng zirtirna (political education) hun an buatsaih Thin te hi a lawmawm takzet a, ram hruaina kawnga Kohhran rilru hriatna Tha tak pawh a ni tel awm e. Pol.party tinten Kohhran leh khawtlanga mi hmingTha an duh vek a, eng inthlanah pawh chutiang mi chu an sawm chhuak Thin a ni. Chutih rualin a sawmtute lam hi an insiam That chuan si loh chuan Thangthar, rilru la thianghlim tak takte hi kawng dik loah an hruai thei tlat a ni. Party mi leh sate insawhnghehnan leh tute emaw hip tumna avanga thu belhchian dawl lo leh rinthu tlangaupui vak vak hi bansan a hun tawh e. Thudik leh thil Tha tih kawnga intlansiak hi kan ram hian a mamawh a, mipuiten kan politician-te kan tehna tur chu an party hmingah ni lovin, an hnathawhah a ni zel tur a ni ang. Politics dik leh Bible zirtirna mil zawnga ram rorel dan tur hi kan Theologian-te hian han tlangaupui tam thei se a duhawm hle mai. Kohhrante pawh hian political education lamah Tan han la leh zual ta se, ram hruaina kawnga fak tlak leh duhkhawp loh lai te pawh sawi hreh lo se kan ziaawm phah mai ang. Tute pawh hi infuih leh siam That ngai vek kan ni a, Kohhran aw phei hi chu kan la ngaichang thui khawp ania.
SENIOR |ANGKAI LO:-
Kawng engkimah hian Senior-te hi an zahawmin an pawimawh fo Thin. Kan ram politics-ah erawh hi chuan ram hruaina kawnga Tangkai vak si lo, senior politician hi party- tinah hian an awm niin a lang. Hetiang ho hian party dang sawichhiat bak sawi tur an hre lova, chu chuan Thangthar mifel zawkte rilru a tinain miTha zawkte kawng daltu an ni thei a ni. Kan hun tawng mil zela Thangtharte rilru leh khawvel thiamna man pha lo tan chuan Thangthar, kut la fai te hi hmun kian thei se a finthlak ngawt ang. Awmze nei lova insawisel vak vak hian Thangtharte rilruah hian hmun a chang tlem tial tial niin a lang a, hei hi thil lawmawm tak a ni. Mi sawisel thiam apiangte hi Politician Tha nia ngaih hun hi liam tawh se a duhawm khawp mai. Kan insawiselna tur pawh mimal nunah ni lovin, ram tana Tha tur inkawhhmuh zawng sawiselna ni Thin teh se. Dikna leh rinawmna, kristian nun ze mawi tak nena ram rorelna kalpui hi kristian ramah chuan thil theih tur niin a lang. Ram hmasawnna atan Tangkai reng reng lo, mimal nun thlenga insawichhiatna, lim leh sawrkar order leh adt.inhalsak Thin hi a kristian zia lova, ram a lak phah chuang lo a ni.
Kan rama politics dik a thlen hi kan duh tak tak a nih chuan kan politiciante hian thil dang zawng aia ram mipuite That tlanna tur an vei tak tak a ngai.Politician ram vei tak tak lo tan politics huangah hian hausakna kawng a inhawng zau hle a, an hausakpui Thin bawk ni pawhin a lang. Hetiang ang politician-te hian rorelna chan an chak chhan pawh ram tan aiin anmahni pumpui tan a nih a rinawm. Politics hi hausakpui tur ni lovin retheih zawk pawh inhuam chunga ram rawngbawlna a ni tih an hriat a ngai a ni. Engkim tan hun ruat a awm, tih ang hian rorelna hi tu party mahin an chelh kumkhua dawn lova, an rorel hun chhung Theuhah hian hnathawh Thatah inel Thin se kan kal dik mai ang. Rorelna chang rih lote pawhin rorel lo pawla awm hi thiam se, rorel lai partyte sawiselah duhtawk mai lovin kawng dik zawk kawhhmuh Thin se, chu chu opposition tihtur dik tak niin a lang e. Mi sawisel thiam tak, ram rorelna kawnga laktlak si lo leh corrupt hle si hi a awm theih tih i hria ang u.
Kan ramah hian kan sakhaw zirtirna mil zawnga pol.party zawng zawngte an intlansiak hun hunah rorelna dik a thleng mai ang.