CD ratio nei hniam bank ho hi kan tangkaipui meuh em tih kan inzawt – Chief minister

Thingtlang thleng phak lo leh inzarpharh loa, khawpuia branch nei ho bank chu credit deposit ratio nei hniam an ni zel a, an ni ho hi kan tangkaipui meuh em tih an inzawt tih chief minister Lalduhoma chuan a sawi.
Mizoram Cooperative Apex Bank-in Reserve Bank of India hnuaia scheduled bank an hmuh chu Nilaini zan khan an lawm a. Hmanpuitu chief minister chuan, bank tam takin thingtlang an thleng phak loa, khawpuiah chauh branch an nei a. Heng inzarpharh tha lo bank hi CD ratio nei hniam an ni tlangpui lehnghal, tiin, “An ni ho hi kan tangkaipui meuh em tih kan inzawt fo a ni,” a ti.
Thingtlang lamah inzar zau zel tura fuihin, Apex Bank chu thingtlang mipui rin, an ban phaka inchhawp, Mizo tawnga dawr theih an nih chuan, an tan customer rinawm tak an ni zui ngeiin a ring tih a sawi a. Sawrkar ngaihpawimawh em em credit deposit ratio a ni, tiin, “RBI chuan bank-te an CD Ratio 60% tal ni turin a beisei a, benchmark a siam a. Sawrkar pawhin he benchmark hi tlin vek turin kan beisei a ni,” a ti.
Apex Bank CD Ratio 65.93 chu Mizorama tha ber nia a hriat thu a sawi a. ATM neih tam lamah pawh hian SBI dawttu a ni mek a. Mizo tawng ngata inziak ATM 45 in enkawl mek a ni.
Cooperation minister PC Vanlalruata MCAB-in RBI scheduled status a hmuh theih chhan chu bank thuneitute leh thawktute thawhrimna, Cooperation department hmalakna vangte nia a hriat thu a sawi a. Dinhmun sang zawkah a hlangkai ngei a ring tih a sawi a ni.
Mizoram Cooperative Apex Bank hi kum 1982 khan sum lu (share capital) cheng nuai 16.53 leh thawktu 16-in bul an tan a. Rambuai lai a nih avangin a tir lamah banking lama thiamna nei chhawr tur an hmu lawk loa, tunah chuan branch 35, ATM 45 leh thawktu 248 leh vengtu 106 a nei tawh. Sawrkar kum liamtaah khan deposit vaibelchhe 1929.53 leh advances vbch. 1272. 11 a nei a, profit vbch. 40.39 hmuin a CD ratio chu 65.93 a ni a, Mizoramah a sang ber.