Mongolia rama taekwondo khel tur Zaii

May ni 19-25, 2026 chhunga Ulaanbaartar, Mongolia-a khelh tur 27th Asian Taekwondo Kyorugi Championship, 9th Asian Poomsae Taekwondo Championship & 11 Asian Para Taekwondo Championship-ah Ruthi Zainunsiami chuan India aiawhin Poomsae inelna a hmachhawn dawn.
Zaii telna India team hi tournament buatsaihtute ruahman angin group hniha then an ni a, Kyorugi (fight) khel turte’n May ni 18 khan India an chhuahsan fel tawh a; Zaii telna Poomsae khel turte chuan nimin khan India chhuahsanin Mongolia an pan ve thung.
Mizo nula hian vawiinah a khel tan dawn a ni.
India aiawh tur hian Zaii hian selection stage hrang hrang a paltlang hnuah March ni 29 khan Bangalore-ah final selection a paltlang leh a, under 50 mixed pair-a khel tura thlan a ni.
Zaii hi Ramhlun Sporting Club atanga taekwondo zir chhuak niin, Mizoram tan gold medal paruk, silver pali, bronze panga a la tawh a; kum 2023 khan Hongkong khuaa nghah Poomsae World Championship-ah India tan a lo khel tawh bawk.
Kha mi tum khan uiawm takin quarter-final match-ah Brazil aiawh hneh loin a vanduai a; tun tum hian India tan medal hawn tura beisei zinga mi a ni.