Ke chauh hmanga mawza bun rang thei ber

China a cheng Li Fengqiang chu electric current-in a man avangin a ban pahnih tan a ngai a, mahse, kut leh ban nei lo a awm chung pawhin record siam dan kawng a hre tho mai. Ke ringawt hmanga mawza bun leh phelh rang thei berah Guinness World Records-in an puang tlat. Li hian a kut hmang miah lovin second 25.73 chungin mawza a bunin a phelh leh hman tlat.
Li hi kum 48 mi a ni tawh a, pianphunga rualbanlo te tana sports coach a ni a, niktin khawsaknaa kut hmang lova buai lo a awm theih kawng hrang hrang zirin, midangte pawh zirtirtu a ni ta a, a ke chu a kut ang thawthangin a hmang thiam tawh a ni.
Li hi mipa naupang kum riat mi a nih laiin electric current man avangin a ban tan sak a ni a, “Khami kum atang khan ka nun kawng a inthlak danglam chiang ta hle a, mahse, dam khawchhuak tura ka huaisenna erawh a bo phah lo e,” a ti.
Li chuan kut aia ke hmanga thil tih vel chu thil harsa zet mai ni mah se “theih loh chu a ni lo,” a ti a, “Ka ban an tan hnu khan engkim ka zir thar leh vek a ngai- ei leh in, thawmhnaw hak, thil ziah leh zunram thiar thlengin zir that leh vek a ngai. Ke zungpui pilh pheng phunga zir chang a awm a, an tluk leh thal deuh tawp tawp chang pawh a tam. Mahse, nih ang ang a awm tawp nge beih tang tang tihah duthlang tur ka ni, ka inti a. Beih tang tang chu ka thlang a, ka kut aia ke hman chu ka damchung zirlai a ni ta a ni,” a ti.
Li chuan, “Kut leh ke nei ten an kuta an tih theih ang chu ka kein ka ti ve thei tur a ni, tih chu ka infuihna leh ka thuvawn a ni. Engtin nge kut nei lovin i tih theih ang, tih zawhna hi ka dawng hnem tawh. Chutiang zawhna chu ka thil tihin chhan ka tum thin,” a ti bawk.
Li chuan mawza bun leh phelh ran chu amah intihlar a tumna lam aiin amah a inchophurna leh theih loh anga ngaih tih theih tuma a beihna a nih zawk thu a sawi a, “He record siam tur hian nitin kut tel lova mawza bun leh phelh ran hi ka zir thin a ni,” a ti.