Vohbik tana ruahmanna siamah PwD hotu in Serchhip District Hospital fak

‘Accessible India Campaign’ hnuaiah Persons with Disabilities (PwD) Mizoram commissioner Vanlaldiki Sailo kaihhruai Access Audit Team chuan Serchhip-a sawrkar hmunhma hrang hrangah vohbik tana awlsam zawka luh chhuah theihna (Access Audit) an siam dan an endik.
PwD commissioner chuan 2025 February 21 atang khan Mizoram hmun hrang hrangah ‘Access Audit’ hi nei tanin, Serchhipah hian DC office, District Hospital, Govt. Serchhip College, Shalom Special School leh Govt. Serchhip Higher Secondary School an endik a. Serchhip-a hmun pawimawhah vohbikte tan hmunhma nuam tak siam a ni chu lawmawm a tih thu sawiin, a bikin Serchhip District Hospital leh Govt. Serchhip College chu vohbikte tana hmunhma buatsaih kawngah fakawm a tih thu a sawi a. Serchhip District Hospital chu District Hospital dangte tan entawntlak a tih thu a sawi.
Ram changkang apiangah vohbik an ngaihsak zual tih sawiin, “Pianphunga rualbanloten pangngai taka nun an hman ve theihnan a tulna apiangah kan tanpui an ngai hle,” a ti a. Sawrkar laipui duh dan angin, sawrkar pisa, zirna in, bak in leh vantlang mipui punkhawmna hmunah vohbikte tan hmunhma nuam (accessible environment) kan buatsaih zel a tul tih a sawi.
Wheelchair hman ngaihna hmun, mitdel tana braille tarna hmun siam dan, mipui punkhawmna vantlang building hrang hranga an kalvelna tur hmunhma buatsaih dan ruahmanna (drawing) a sem nghal bawk.