Skywalk leh ropeway ah thil diklo ti angin min hmehbel – John Rotluangliana

Sawrkarin skywalk leh ropeway siam a tumnaah Congress sawrkar laia bul tan a nih avangin mi tam takin thil dik lo ti angin an hmeh bel tih minister hlui John Rotluangliana chuan a sawi.
May 22-a Congress Bhavan inkhawmah MPCC vice president John Rotluangliana chuan, MNF sawrkar lai khan skywalk leh ropeway chungchangah ACB-ah FIR thehluh a ni a, he hna hi Congress sawrkar laia bul tan a nih avangin khatih laia a hminga minister incharge a nih avangin mi tam takin thil dik lo ti angin an hmeh bel thin tih a sawi.
Hemi chungchang kalzelah tunhnaiah an chargesheet dawn a, man hmingchhiat ngei an tum thu amah duhsaktuten an hrilhru a tih sawiin, “Eng ang pawhin man mualpho che an tum a, anticipatory bail lo dil teh, an ti a. Thil harsa turah pawh kan ngai loa, mah se, court-ah sawrkar ukil-ten min object ta tlat a, kan la chhiar loa, hun kan mamawh an ti a, chawhnu dar 2-ah tih turin judge-in hun a pe a. May 5 chawhnu dar 2-ah sawrkar ukil-te hian political pressure a nat lutuk avangin min object a ngaih thu an sawi a, thi leh thau pawlha an bei vak chungin May 12 khan anticipatory bail hi kan hmu ta a ni,” a ti.
May 19-a court atanga chargesheet copy an dawna a landanin, Tourism Information Center sakna tur sum revise estimate siamtirah leh, Rajiv Nagar-a Tourist Lodge sakna tur sum divert, tia sawi a ni a. Rajiv Nagar-a Tourist Lodge hi sak zawh a ni tawh a, an hawng tawh nghe nghe a, bill erawh la pek zawh loh a ni, tiin, Tourism Information Centre pawh Tourism Directorate bulah office atana hman nghal nise, tih a nih avangin revise estimate hi siam a ni tih a sawi.
Central project – Swadesh Darshan Project ah Mizoram tan cheng vaibelchhe 99 sanction atangin vbch. 49 an hmu tawh a. He project hnuaiah hian skywalk leh ropeway bakah hna dang 8 vel a awm a ni. Chutihlai chuan mi thenkhatin vbch. 49 hi skywalk leh ropeway atana hmang zo vek angin thuchhuah an lo siam tih Tourism minister hlui John Rotluangliana hian a sawi a. skywalk bul tanna tur hi 2018 April 3 khan Sakawrhmuituai tlangah phum a ni tih a sawi bawk.
MNF sawrkarin chhunzawm duh loin, FIR thehlutin harsatna siam a nih tak avangin he project hi sawrkar laipuiin a rawn cancel ta a. Mizoram sawrkarin cheng vbch. 50 a chan phah ta tih a sawi a ni.
“Skywalk leh ropeway-ah hian min bei eng ang mah se, cheng khatmah ka eiru lo tih hi Pathianiin min hriatpui a. Court-in dik takin ro a rel anga, thudik a rawn lang mai dawn. ZPM sawrkar hian an ukil-te hmangin tikhawtlai zawng ni loin, thudik haichhuah a nih thuai theihnan hma la turin ka ngen a ni,” a ti.
Mi thenkhatin anticipatory bail laa ngawi ta kar nia an sawi thu pawh MPCC hruaitu hian sawiin, “Ka ngawi kar dawn reng reng lo. Vawiina SASCI an tih lapse te hi ka lo thlir ve reng. A lapse lo an tih kha mi thenkhat thahnemngaiin central sawrkar ah an zuk zawt a, a lo lapse ngei si,” a ti.