Arsenal hneha champion PSG

May 30, Inrinni zan khan Hungary khawpui Budapest-a Puskás Aréna-ah UEFA Champions League final khelh a ni a. Inkhel hmuhnawm takah Paris St-Germain chuan Arsenal hnehin an champion nawn leh.
Arsenal an nui hmasa
Champions League 2025-26 ah tlawm nei miah lova final lut thei an ni chungin Arsenal hian champion lai Paris St-Germain (PSG) lakah rin an kai zo lo. 2025 final-ah 5-0 ngawta Inter Milan sawptu PSG hian Arsenal lakah goal thunin hnehna an chang leh ngei tura ngaih a ni hlawm. Chutihlai chuan an khingpui Arsenal hi tlahnung ber thiam, 2025-26 season a goal chhuah tlem ber an ni miau a, tlarhma nei tha, goal thun thei tak PSG tan goal thun a harsa hle thung. Arsenal nuih hmasakna inkhelah penalty hmanga an si phurh an sut hnuin penalty shoot-out ah PSG an vannei zui leh.
Rinkai lo zawk Arsenal hian PSG tlarhnung chet fuh tawk loh vangin goal thun theihna hun tha an nei thuai. Kai Havertz chuan a hun tha neih chu a chhawr tangkai a, near post top corner-ah fuh zeta pet goal in, minute rukna lekah hmahruaina goal a thun. Havertz hian UCL final-ah Chelsea a lo chakpui tawh a, Arsenal pawh a chakpui leh teuh viau naa an Teuhsenal ta hlauh thung.
PSG an nui ve ta
An si phurh sut tumin tan khawh bawk mah se PSG in Arsenal tlarhnung phui tak an paltlang thei lova, hun tha an nei thei lo. Arsenal zawkin goal an thun belh leh teuh viau zawk a, Havertz pet hlauhawm tak chu captain Marquinho chuan fuh takin a lo dang hman hlauh a, goal an chhuah belh lo hlauh.
An si phurh an sut theih loh reng hnuin PSG an vannei ta nge nge a, penalty an hmuh. Arsenal defender Cristhian Mosquera chuan box chhungah player hlauhawm Khvicha Kvaratskhelia a titlu a, penalty a chawi. He penalty hi Ballon d’Or kawl mektu Ousmane Dembele chuan si nghak David Raya rin loh lamah fuh takin a pet goal a, minute 65-naah an si phurh a sut.
1-1 a nih hnuin inkhel a hmuhnawm zui viau a, ber reng chunga Arsenal nawr let a hlauhawm thei viau. Arsenal hian penalty beisei viau mah se an beisei thlawn a. Nuno Mendes-a’n Noni Madueke a tihtluk vanga Arsenal penalty pek an ni ta lo hian sawi zui a hlawh zui hle nghe nghe.
Minute 30 dang an khelh belh leh chung pawhin inkhel hmuhnawm takah hian goal a luh belh thei tawh lova, penalty shoot-out hmangin champion tur zawn a ngai.
Arsenal tana pettu Eberechi Eze chuan pet out in a thelh a. PSG tana pettu Nuno Mendes-a’n a thelh zui ve leh. Arsenal tana pet hnuhnung ber Gabriel Magalhães chuan goal kham chungah petchhuak luahin a thelh a, PSG chuan 4-3 a hnehna changin an trophy kawl mek an humhim a, Champions League-ah an champion zui leh ta a ni.
Faktlak Luis Enrique
Khawvela player ropui ber ber; Lionel Messi, Neymar leh Kylian Mbappe te an nei chung pawhin PSG hi champions League-ah an champion thei ngai lo. Player langsarfal nei lova, manager thluak tha Luis Enrique an neih hnuah erawh UCL-ah an champion ta hial. Fak phu chu Enrique hi a ni.
Enrique hian player langsar fal nei lovin team anga thawkho thiam a din. Messi, Neymar leh Mbappe te tel lovin team tha zawk a din a, ah rah chu UCL ah an champion zawn.