Head Coach Uluk Z arkawt BCA An star player pathum la kim

Zarkawt BCA chanchin thlir hian head coach an uluk hle tih MSL 12 hmachhawn tura an inremkhawmna kawngah hian a langsar hle. MSL season nga (5) chhungin head coach panga an nei hman dawn.
MSL tum li a zawn zata MSL champion-puitu leh tum hnih a zawna MSL champion-puitu an head coach-te pahnih chu ruai chhunzawm lovin, season liam taa semi final hruai thlengtu an head coach ngei pawh asst. coach-ah an dah ta bawk – hei MSL 11 a club Mission Veng Hotshots beisei phak baka result tha tak hnutchhiahtu H. Lalhruaitluanga (Ahruaia) chu Zarkawt BCA head coach a ni ta der e.
Zarkawt BCA hian tunhnaia an head coach pathumte an siksawi dan thlir hian Ahruaia tan hian chona leh pressure a sang dawn tih hi a chiang. Senior player pathum a neihte hi a kaihhruana hnuaiah an hnip dawn nge, an khirh viau dawn tih hi hunin a herchhuahpui dawn! MSL 12 result-ah ringawt a cham zui dawn nge a thlawn vat ang tih hi a hriat loh!
Zarkawt BCA hian an club star player pathum Matthew Sailo, Lalrina Renthlei leh Zonuna an la kawl thei dawn a – player discipline tha Hmachhuana leh Sangsanga an la kawl chhunzawm dawn bawk.
An captain club danga la khel ngai lo, chhiar mai theih chinah ringawt pawh MSL defensive player tum nga zet dawng tawh Matthew Sailo hi mimal thil avangin registration tih laiin Aizawlah awm lova, tunah hian squad-ah awm rih lo mah se a club ngaiah hian a la khel dawn. Hetih rual hian point guard tha bik, basketball court pawn lma thawm zawi Zonuna pawh tun season hi a club tan hian season 10 a khelhna tur chiah a ni.
Mizo basketball hnam dang laka phochhuaktu langsar fal nalh Lalrina Renthlei pawh season khat lai hliamin a tlakbuak hnuah inkhel turin a inpeih – Lalrina is back!
Mizoram Super League (MSL) a record nei tha ber club hi club dang angin managing board a hranpaa nei an ni lo va, a tul angin club puipa leh team lamin thawm zawi te neiin inrelbawlna hi an kalpui thin – he kalphung hi an hlawhtlinpui zui bawk a nih hi!
An head coach Ahruaia hian MSL tih loha Zarkawt BCA in an rinngam, MSL a inherchhuaha an theihnghilh thin Kulikawn tlangval Benji-a hi hmang thiam tak maw? Sangkima pawh a la inlan dawn cheu.
He club hian player 12 ziak lutin, Aizawl veng 10 atangin player hi tun season-ah hian an lakhawm – Zarkawt player pali thawt an nei dawn.

Zarkawt BCA squad

1. Lalsangkima – Zarkawt
2. Joshua Laldinthara – Zarkawt
3. Remruatsanga – Zarkawt
4. Zonunsanga – Zemabawk
5. Lalrina Renthlei – Tuikhuahtlang
6. Benjamin Zothansiama – Kulikawn
7. Chawngdingluaia – Bawngkawn
8. F. Malsawmsanga – ITI
9. H. Lalhmachhuana – Khatla South
10. Lalhmingsanga – Chawlhhmun
11. Vanlalchhuanawma – Hunthar
12. Michael Liansanga – Kanan

Coaching Staff

1. Head Coach : H. Lalhruaitluanga – Mission Veng
2. Asst. Coach : K. Vanlalruata – Kanan
3. Manager : Lalfakawmi – Zarkawt