Zawlkhawpui Hmar lam lal Zemabawk BC
The Aizawl Post Hoops Mania chuan MSL 12 khel tura inbuatsaih mek club te kan bihchiang thuak thuak a, cheng nuai za chuang fe club ho ten senso an thehchhuah ngaihna MSL ah hian Zarkawt BCA leh Khatla TBL ten vung takin ro an rel thin a, han elpha an awm meuh lo; ngaiteh, MSL 10 a lo inherchhuak a, hmar lam thlipui a rawn inmung mup mup zui a – Zemabawk BC an rawn lang hlawl a, thawnthu a danglam chho ta tlat!
Infiamna khawwvela hming dai tawh lo tur Sir Alex Ferguson khan ama chanchin a ziahna (Autobiography) ah khan Scotland hmar lamah chuan kal thui poh leh mipui an lo ngawichawi tial tial a, ṭhian siam an lo harsat hle tih a ziak a; amaherawhchu, Aizawl hmar lam hi han thleng thui deuh deuh ila – basketball thawm a lo ring tial tial thung!
Zemabawk BC hmangin the undivided Zemabawk (Zemabawk, Falkland leh Thuampui) ten Aizawla basketball veng liante an barakhaih a, an thawm hi haider rual a ni lo!
An tualchhung baller-ten an veng chhehvela inkhel theihna awm tawh phawtah chuan tlim khawm hmur tham an awm reng – thalaite an phur tih hi The Aizawl Post Hoops Mania pawhin a hmuhpui tlat!
Zemabawk BC hi management board changtlung tak nei an ni a, an MSL season hmasa kum thum chhunga champion tum ngam an ni. MSL 10 – semi finals, msl 11 – finals leh MSL 12 – champions tih hi an club puipa ten an club calendar an duanna kawngah a thleng chho mek.
An head coach Liansangpuia an mangtha fel ta der – MSL finals thlen satliah ringawt hi an club puipa lam te lungawina chin a ni lem lo tih a hriat! Chutih rualin, Most Valuable Player (MVP) chawimawina dawng pha thei khawpa theihna nei an star player Ropuia leh innghahna tlak palian Thianga te an la kawl.
A tawi zawngin sawi ila, champion-pui tham Ruatkima Hotshots captain hlui an lalut a, Rinzuala a rawn let leh zui ta bawk nen – ngaihthatpuitham tualchhung player chu an kawl khawm ta.
Hnam dang player chahluh kawngah erawh bengsika ngaihtuahna an thawhkhawm a tul tawh ang. An veng rawlthar Stephen-a, Kulikawn duo Samuel-a leh Rinchhana te pathum hi tawnhriat la nei tam tawk lo mah se, ngaihthah an thiang lovang!
Zemabawk BC hian head coach tur an la ruat fel lo a, asst. coach tur pawh an la vuah fel lo bawk. An muang sual duai thei, MSL thenkhatin practice an ko chho tan tawh!
Zemabawk BC squad
K. Lallawmawma – Zemabawk
Stephen Lalnuntluanga – Zemabawk
Lalrinawma – Falkland
K. Lalthianghlima – Mission Veng
Lalrinchhana – Kulikawn
Samuel Vanlalpeka – Kulikawn
Malsawmkima Hmar – Khatla East
Michael Lalthakima – Khatla South
Lalropuia – Khatla South
Lalruatkima – Durtlang
Lalrinzuala – Kolasib
Vanlaltluanga – Saron
Coaching Staff:
Manager- Malsawmtluanga, Zemabawk North
Asst. Manager – Lalruatpuia, Zemabawk