Drone-a beihnaah Moscow tuialhthei thlitfimna chhia

a beihnaah Russia-a Gazpromneft ta Moscow tuialhthei thlitfimna hmun a chhiat thu Moscow Mayor Sergei Sobyanin-a’n Thawhlehni khan a sawi.
“Thi an awm lo va. Emergency service-te chuan hna an buaipui zui nghal mek a ni,” tiin Sobyanin-a chuan Telegram-ah a tar lang a. Thlitfim hna thawh a n nghawng em tih pawh sawi lo bawk.
Moscow region-a plant lian ber, tuialhthei ton maktaduai 11.6 a siam chhuak thei a ni a, kum 2024 khan petrol ton maktaduai 2.9 leh diesel ton maktaduai 3.2 a siam chhuak a ni.
Kum 2026 tir lam atang khan Russian tuialhthei thlitfimna hmunte hi drone hmanga beih hi a let hnih zetin a pung a, hei vang hian tuialhthei siam chhuah hi hmun thenkhatah chuan a vaiin emaw, thenkhat emaw tihtawp a ni nual hlawm a. Sorkar chhinchhiahna, social media leh Reuters-in a chhut dan chuan gasoline, diesel leh jet fuel siam chhuah pawh a tlahniam hle a ni.
February, 2022 atanga Russia-in thapuia Ukraine a rûn mek zelah kumin hian Kyiv hian nasa zawkin Russia ram lairil tak tak a bei thar nasa hle a. A bikin an sum hnar pawimawh ber, energy hmunhmate a bei nasa zual hle a ni.
Gazpromneft refinery hi Moscow region chawmtu ber a ni a, tun thlenga Russia-a supply tihbuai tawhna hmun tam tam tak vel zinga la tel ve lo a ni.
Ram pahnihte indonaah hian inkahhai kalpui ve zeuh zeuh thin a, indo titawp tak tak tura hmalakna pawh a awm reng a; mahse, awmze neiin a chhuak thei rih lo zel a. US President Donald Trump-a pawhin bei nasa hle mah se an la indo zel tho a ni.