Mellung thar phun thulh thei lo Messi!

Bench thawhsanin second half-ah khelmual a lut a, free-kick atanga goal khat chhuihlut leh hramin, nimin zing khan Lionel Messi chuan an group match hnuhnungberah an team nem zawk nena inlan Argentina chu Jordan lakah 3-1 hnehna a chanpui leh rualin World Cup-a match sarih chhung tehreng goal khung zawn thei player hmasaber a ni.
Arab team laka 80th-minute free kick a chhuihluh hma thleng khan Just Fontaine (France) leh Brazilian Jairzinho-te nen World Cup-a match ruk chhung goal khung zawn thei an niho dal dal hman a, mahse, Dallas khawpuiah Messi a kalfal zui leh ta a ni.
Dallas Stadium, Arlington, Texas-a thutna awm thei zawng zawng luahkhat vektu mipui 70,649-te chan ber Argentina captain chuan bul a tan lo a, a awm loh hlanin defending champion hian goal khung thei dang pahnih an phochhuak.
A hmasa zawk chu minute 19-a free-kick atanga goal hmahruai thuntu Tottenham midfielder hlui Giovani lo Celso niin, darkar chanve pelh chiahah Inter Milan forward Lautaro Martinez chuan penalty atangin an goal hnihna a thawh ve leh.
Second half tir lamah Jordan lamin lehlam pawl penalty area chhungah movement leh passing mawi tak kaltlangin an siphurh pakhat zawk an sut then a, he goal thuntu hi substitute Mousa Al Tamari niin, Ehsan Haddad-a siamsak a ni a; Jordanian-ho kha 2026 finals hnu lama Argentina goal-veng Emi Martinez-a ven goal-a thun leh thei hmasaber an ni.
An group-a point la hmu ve lo awmchhun Arab team hian phurna thar nen draw tal beisei tura tha an thawh zui laiin hun tawp hma minute 10 la awmah Lionel Messi ngei mai chuan Jordan beiseina tihtawpsakin tournament kal laia a goal rukna a thun a, 2026 World Cup top scorer inelna kal mekah hmahruaitu a ni.
Lionel Scaloni khan an game hnuhnungbera Austria hnehtu a starting line up atangin player pakua ngawt Jordan game-ah khan a chawlhdahdamtir phawt a, mahse, Jordan hneh turin an team tha zawk pawh an khawng tawk a; an superstar Messi luh hnuah goal khat a han thawh leh hram a, Argentina hian group stage-a 100% chak record nen Group J hmahruaitu ni chungin knock out round lutin, last 32 lamah World Cup debutant Cape Verde an hmachhawn ang.
Pathianni zing Dallas inkhelah khan darkar khat an khelh tlin rual chiaha Barcelona forward hlui Messi khelmual lut thawm kha minute 90 chhunga thawm ring ber a ni leh hialin a rinawm a!
Tournament kal mekah top scorer niin, golden boot dawngtu tur zawnna kal mekah amah hnaihbertu chu goal hnihin a kalsan a, World Cup goal khung hnember a nihna zawnah pawh goal 19 ngah tling tain, tam vet vet tak a ni tawh!
Group J inkhel dangah Austria chuan hun pekbelh minute 96-ah an siphurh sutin Algeria nen an inhnehtawk a, an pahnih hian knock round kai turin an tling ve ve a, Jordan erawh kut bengin an tla!