Mizoram larsap hlui Lakhera boral

Mizoram larsap hlui Lt Gen MM Lakhera chu June ni 29 khan kum 88 mi niin Dehradun-ah a boral a, hemi ni hian vuiliam a ni.
MM Lakhera hi July ni 25, 2006 atanga September ni 1, 2011 thleng khan Mizoram larsap a ni a, Mizorama a awm chhung hian ngainat a hlawh a, amah dawrtute pawhin an zahin an ngaina zui thin.
Sipaia a tan lai pawhin a hmingtha a, 1961-a Goa operation-ah te, 1965 leh 1971 tea India leh Pakistan indovah te hmingtha takin sipai hna a thawk a ni.
2004-2006 khan Puducherry (UT) lieutenant governor a ni a, Andaman and Nicobar Islands (UT) a hmui tawh bawk. Puducherry-a a awm lai hian tsunami tuartute chhawmdawl kawngah a hmingtha hle.
Pi leh pute atanga thiamna inhlan chhawnna lam (traditional knowlege) ngaihlu mi a ni a, Mizorama a awm lai pawhin traditional knowledge vawn nun a tul thu a sawi fo. ZoRO-in Zo Inpui an hawn tum pawhin khuallian a ni a, Vanapa Hall-a thu a sawi tumin Andaman and Nicobar Islands-a Onge tribe-te chungchang sawiin, tsunami a thawh dawn khan an traditional knowledge hmangin an lo hre lawk a, an lo insaseng hman tih a sawi.
Mizorma larsap General (Dr) Vijay Kumar Singh-a’n instagram-ah Lt Gen MM Lakhera sunna thu a sawi a, “Mizoram a hmangaihna leh a inpeknate theihnghilh a ni ngai lo ang. He channa nasa tak hi state pumin pawi a ti a ni,” a ti.
Chief minister Lalduhoma pawhin facebook-ah Lt Gen MM Lakhera sunna thu a sawi a, “Mizoram governor a nih lai kha gentleman dik tak, hruai tu zahkai a ni a, a thiltih leh a thawhrahte kan hre reng ang. A kalsan tak a chhungte thinlung takin ka tuarpui a ni,” a ti.
Chief minister hlui Zoramthanga pawhin instagram-ah sunna thu a sawi a, “Lt Gen MM Lakhera hian Mizoram larsap hna a chelh chhungin ram hmasawnna turin nasa takin hma a la a. Ram mipuite ngaihsakna leh hmangaihna nasa tak a lantir a; larsap nih tlin tak niin, ram rorelna kawngah pawh dikna leh rinawmna a vawng nung hle thin. Mizoram tana a inpekna leh hnathawh zawng zawngte kan hre reng tawh ang,” a ti.