Inlehthalna ropui thlentirtu Belgium

World Cup 2026 khelh mekah Ningani zing khan inlehthalna lian a thleng a, 2-0 a hnufual reng Belgium chuan mak tak maiin Senegal chu 3-2 in an hneh let a, last 16 an lut. Last 16-a Belgium tum leh tur USA pawhin an khingpui Bosnia & Herzegovina an hneh ve bawk.
Inkhel hmuhnawm, enmawm ropui
Europe-ah pawh team lian pawl tak ni reng thin Belgium leh African champion Senegal te hi group match a bul tan tha lo ve ve, a tawp khar tha ve ve an ni. Belgium in Egypt leh Iran an hneh zawh loh hnuin New Zealand an hneh nawlh a, group champion ni chungin last 16 an lut. Belgium kawng a awlsam laiin Senegal kawng erawh a harsa viau thung. France leh Norway te nen an awm tlang a, anni team hnih lakah hian an tlawm ve ve phawt. Group match hnuhnung berah 5-0 ngawta Iraq an sawp an chhawr tangkai a, pathumna zingah ti tha pawl niin last 32 an lut.
Beisei anga khel tha lo Belgium lakah Senegal hi rinkai zawk an ni a, rinkai zawk an nih ang ngeiin an khel tha a, goal hnih thun hmasain chak pawh an chak teuh viau. Last 16 lut ngei turah inngai tawh mah se hun tawp dawna an talbuai an tuar a, uiawm takin hun pangngaiah an chak zo lova, extratime tawp dawn tepah penalty an chawi zui leh ta zel a, an tum a fuh lovin, an vanduai a kal tluang tak zet a ni.
Senegal hian beisei ang ngeiin Belgium lakah an khel tha a, Habib Diarra chuan inkhel tan atanga minute 24 naah hmahruaina goal a thun. Goal thun hmasa zawk an nih vangin African champion an phur a, an khel tha zui viau nghe nghe. Chawlhlawk hmain goal thun belh thei lo mah se chawlhlawk hnu lamah goal an thun leh thuai a. Khel tha tak Ismaïla Sarr chuan minute 51-naah an goal hnihna thunin an hmahruaina a tizau. Si hnih faia hma an hruai vangin Sengal hian last 16 an hnaih hman hle a, Belgium hi tla ngei tura ngaih an ni hman.
Dinhmun chhe takah ding mah se Belgium an hnual mai lova, huaisen takin an khingpuite an hmachhawn a, hun a tawp rak hma chu an beidawng duh lo. An huaisen leh an thawhrim rah an seng a, hun tawp dawn tepah goal hnih an thun ta nge nge. Veteran forward Romelu Lukaku chuan minute 86-naah goal thunin an si phurh a sut. An si phurh an sut vangin an phur thar hluai a, na takin an khingpuite an nawr chhunzawm. Belgium in an nawr nat em vangin Senegal an talbuai a, goal an chhuah nawn leh. An si phurh an sut atanga minute thum hnu lekah midfielder Youri Tielemans chuan tauh goal in an si phurh a sut zo ta nge nge.
Hun pangngaiah 2-2 in an inhnehtawk a, extratime-ah pawh an inhnehtawk zui leh teuh hle. Tie-break hmanga chinfel an ngai dawna a lan hnuin Senegal an vanduai zui leh a, penalty an chawi. Penalty hi Youri Tielemans chuan minute 120’+5-ah a pet goal a, hma an hruai letna goal a thun. Belgium hian mak tak maiin Senegal an hneh let a, World Cup-a inlehthalna lian ber pawl an thlentir a, USA hmachhawn turin last 16 an inhlangkai.
Ningani zinga inkhel dangah inelna thlengtu USA chuan an khingpui Bosnia & Herzegovia chu Folarin Balogun leh Malik Tillman te goal thun hmangin an hneh a, an tualzawlah ngei chakin last 16 an inhlangkai ve bawk.