Messi, England leh history

Messi, England leh history
Atlanta khuaa Argentina-England semi-final zan kan thleng dawn a, ram pahnih inkhel tur boruak lian tak hian hmun lailum a luah rih a ngai!
Argentina hi knock out match pathuma damkhawchhuak tawk tawk vek niin, match hnih phei chu extra-time khelh thlen ngai khawpin an talbuai a, chak mai an awlsam bik lo!
England pawh extra-time hnehna tum hnih chang zawn chunga last four lut ve hram tho bawk niin, zanin hian hmai zangthal ha chunga khelmual lut tur an nih hmel bik loh!
Tarlan tawh thin angin, 1966 World Cup trophy bak la chawi lo England hi 1982 Falklands War-ah Argentina nen an indo a; kum 1986-a Diego Maradona ‘Hand of God’ goal avanga an lungngaihna leh thinrimna tawp hlei thei lo chungchang sawi nawn leh thin a tul a; kum 1998 leh 2002-ah ram pahnih inbeihna lian khawvelin a lo thlirliam tawh bawk a; team hnih inhmachhawn boruak hian football piahlam ken tel a nei tuai bang thei lo!
He boruak teh lukah hian Argentina player-te leh an coach Lionel Scaloni chuan ram pahnih inhalna hi a hnuhnang (emotion) zawnga kalpui loh hram an tum a, zanin semi-final pawh hi an football history-a lawmman lian pakhat an beisei leh mekna kalkawng a nihna zawn bak khaw dang thlir tel an tum lo tih a sawi!
Lionel Messi pawh a tawng chhuak a, “A nihna anga kan tawnbuak mai a ngai: World Cup semi-final khela kan tum turte hi powerhouse, team ropui an ni a, anni kan hmachhawn lehna turah hian a tha thei ang bera inlan kan tum a ngai,” tiin.
Tarlan tawh thin angin, reigning champion hi nuamsa taka last four lut an ni lo.
Extra time khelh zawhah 3-2-in an nau vang vang tura ngaih Cape Verde an paltlang hram a; sihnih faia an hnufual reng hnu hun tawp hma minute 11 lek awm tawha goal thum thun chungin Egypt lakah 3-2 comeback an lantir leh thei hram a; team naran tura ngaih Switzerland laka 3-1 hnehna chang tur pawhin extra time khelh thlen an mamawh!
England zinkawng pawh hi a tluang purh bik awzawng lo!
Thomas Tuchel-a team hi a hmun san vanga inkhelh harsat em emna Mexico City-a round of 16 lamah khan player 10 ni chungin Mexico an paltlang thei hram a; Miami khawpui lum uap hnawng churh hnuaiah vur ram lehzual atanga thawkchhuak Norway laka 2-1 hnehna chang turin extra time nghah thlen an ngai.
Zaninah Argentina-in dinhmun harsa tak atangin kawng dik an zawh chho leh dawn a nih chuan England pawhin hlauhawm tlanchhuahsan dan thuruk an kawl mek kha an phawrh ve leh ngei a ngaih hmel a, Jude Bellingham-a pawimawhna an sawrchhuah leh theih a tul khawpin a rinawm!
Kum 23 leka upa ni mah se Real Madrid midfielder hian Mexico laka goal hnih a thun bakah Norway lakah pawh chuti zat bawk khungin, English team tana kawl loh theih loh a ni mek!
Harry Kane chu captain la ni zui zelin, an goal bawh hmahruaitu la ni reng bawk mah se tun tournament-a England mamawh chhanna ni mek zawk chu Bellingham a ni rih tlat!
Tuchel-a team tan mimal pahnih khat chetthat mai hi trophy an beisei mekna kawngah a la tawk zo chuang lo a, England manager hian a team khelhho danah beisei sang zawk la nei rengin, inkhel thunun leh tihdik tam kawngah a naute a la tur ve reng.
Argentina beiseina innghahna pui ber ni leh tur pawh tournament kal laia goal riat tehreng khawl tling tawh Messi leh bawk niin, Golden Boot inchuhna kal meka a elpui lian ber ni mek France forward Kylian Mbappe khan nizanah a khung belh zo lo a nih chuan zanin hian kalsanna chance a nei ang.
Zanin match chungchangah hian Manchester City leh Manchester United tana khel ve ve tawh Argentina striker hlui Carlos Tevez khan ram pahnih inhmachhawn turah history bawk kaihthawh a nih leh tur thu sawiin, “Kum 1986-a Diego thiltih avang khan phuba lak an la duh dawn chiang a, chu mawlh chuan a mawlh leh dawn a, Diego kaltlanga inhuatna chi nung kha haw hle mah se phumbo an duh lo,” a ti.
World No. 19 Switzerland kha tun tournament kal laia South American team tum tawh zinga ranking sang ber an la ni a, chuti chunga Scaloni team-in round tina an theih tawp piahlam hret an chhuah zel a ngaih dan enin Tevez hian an team dinhmun tur sawilawk thiam harsa a tih thu leh mimal quality chu danglamna thlen thintu a nih thu a sawi.
He tih lai hian England forward hlui Ian Wright ve thung kha chuan Argentina inkhel a en tawh atangin an hneh theih ngei a rin thu a sawi.
“An khelh dan leh harsa taka an damkhawchhuah hram hram dan enin kan danbeh theih ka ring,” a ti.