England vs France ticket a la chuang teuh mai!

A inkhel tur-a-te football ram ropui ve ve mah ni se pathumna zawn inchuh zet chuan ram pahnih fans pawh chuti lutukin a hip lo a ni mai thei a, nimin thleng khan zanin Miami Stadium-a semi-final paltlang zo lo team pahnih England leh France-te’n World Cup pathumna nih an inchuh tur ticket chu sang tel teh meuh a la chuang!
Fifa ticket site hrang hrangah a hmuna bronze medal match enna tur ticket lei theih 7,000 zet a la chuang hnuk a; general sale lama ticket la bang 1,246 awmte chu USD 865 (£657) leh USD 1,125 (£855) mante a ni.
Ticket zawrhna hmun dang official resale platform-a lei theih ticket 5,864 dang la awmte chu a tlawm ber chi (category three) niin, USD 455 (£346) plus Fifa 15% fee a ni.
He’gte bakah hian a man sang chi higher-priced category hrang hrangah pawh lei tur a la awm nual bawk.
A man to ber category one ticket man pangngai chu USD 1,125 (£855) niin an discount hnuah USD 659 (£500) a ni thung.
Pathianni zan World Cup final pawh nimin tlai thleng kha chuan an la hralh zo thei bik lo a, general sale lamah ticket to ber chi 32 a la awm!
A to ber chite hi USD 29,995 (£22,796) atanga $32,970 (£25,057) man a ni hem mai a, hei hi standard ticket niin, VIP erawh a ni lo.
Tun dinhmunah US Dollar khat leh Indian Rupee 96.28 intluka chhut niin, Pound sterling 1 leh Indian Rupee 129.44 intlukna ngaih a ni bawk a, he inthlauhna atang hian India pawisaa category one ticket pakhat man a chhutchhuah theih awm e.
Fifa resale site lamah chuan final enna tur ticket-te hi sang chuang lei tur a la awm a; he’ng ticket man pangngai (original price) hi USD 7,380 (£5,609) a nih laiin i lei dawn tak tak chuan Fifa atangin extra USD 1,107 (£841) i chawi tel a ngai dawn!
Final enna atana ticket zawrhchhawn (resale ticke) man to ber chu US dollar maktaduai 2 (£1.52m) bakah Fifa fee USD 300,000 (£228,000) chawi tel ngai a ni hem mai!