Feet 80 aia hla atanga basketball vawm lutin record siam

Egyptian basketball player, Egyptian National Team a tel chuan a thiam thil hmangin Guinness World Record a siam, basketball hook shot hla ber leh basket hnungchhawn zawnga basketball vawm lut hla thei ber record a siam. Heng record pahnih te hi ni khat thil thuaa a siam ve ve a ni lehnghal.
A hming chu Alie Wessam a ni a, tlangval kum 21 mi a ni, basketball khelha ball vawm luh an tumna basket atanga feet 82 leh inces 10 a hla atangin a vawm lut nalh thei a, hook shot hla ber record a siam a, hei bakah hian basket hnungchhawng zawngin, basket atanga feet 90 leh inches 6 a hlaah dingin, hnung zawngin basket-ah tak a vawm luh chat thei bawk a, hei pawh hi hnung zawnga basketball vawm lut hla thei ber record a ni bawk.
Hnung zawnga vawm lut hla thei ber record hi Harlem Globetrotters star Corey “Thunder” Law-a’n 2024 khan feet 87 leh inches 8 a hla atanga hnung zawnga vawm lutin record a siam a, he record hi Alie Wessam hian a rawn khum ta a ni.
Wessam chuan, “A nuam danglam khawp mai. Harlem Globetrotters hi naupan lai atanga hmuhnawm ti taka ka thlir thin an ni a, an record zinga pakhat khumtu ka lo ni ve thei hi a nuam danglam hle mai a, hetiang thil hi a thleng ang tih pawh ka lo rinphak ngai loh a ni. An hlawhtlinna leh an sulhnu zawng zawng hi ropui ka tiin, zah phu an ni a, mahse, competitor ka nihna ang zawng chuan hmalam pan zel turin ka infuih a, an record dang pawh la khum thei turin tan ka la zel dawn a ni,” a ti.