Dipke-a’n inbe tura sorkar chet hmasak phut, Pradhan a tawng chhuak

Thla hnih kal taa Cockroach Janta Party (CJP) movement dintu, Abhijeet Dipke-a chuan an lungawi lohna leh an thil phut lantir meknaah sorkar chu che hmasa zawk tur an nih thu sawiin an duh a nih chuan an duh dan ngaithla chunga be turin a ti.
Hetih mek lai hian bang tura an duh ber, Education Minister Dharmendra Pradhan-a pawh a tawng chhuak a, zirlaite hmakhua an ngaih thu a sawi.
Thla hnih kal taa movement dintuin Nilainia thuchhuah a siam hi NEET exam zawhna put ru avanga education minister bân phuta a hma ni hnih kal taa zirlai sang tel tak meuhvin parliament building pana kawng an zawh hniah a ni.
NEET exam hi India-a undergraduate medical course zir thei tur zawnna niin kum tin zirlai maktaduai telin an exam thin a n.
“Sorkar hian inbiak a duh a nih chuan lo kal rawh se. Kan duh dan ngaithlain lo kal rawh se,” tiin kum 30 mi, Dipke-a chuan a sawi.
“Sorkar hi pawm turin kan ngen a, chu chu a tawpna tur a ni,” a ti.
He chanchin ziah lai thleng hian sorkar hian biak a tum em tih hriat a la ni lo va. “Lungawi lote hi an lo kal a nih chuan inbe turin kan inpeih,” tiin a sawi ve tho niin NDTV chuan a tar lang.
CJP erawh chuan sorkar zawk hi inbe tura che hmasa ngei tur niin an ngai a. “Inbiakna chu sorkar hian tun lam awm lohna hmun (neutral venue) emaw, Jantar Mantar-ah emaw a ti thei a. Kan thil phut hi kan hnuk kir dawn lo va. Kan duh chu education minister a bân a ni,” tiin an thupuangtu, Ashutosh Ranka chuan a sawi.
Lungawi lo aiawhte inhmuh khawm vawi hnihna chu Nilaini chawhnu khan koh a ni.
Thawhlehni khan Dipke-a chuan sorkar chu a kaihhruai pawl nena inbiak dan tur a ruahman dan a zawt a, police-in pungkhawmte a hnawt darh chunga CJP nena inbiak kalpui tumna chu a duh lo.
“Sorkar hian kan hun min khawhralsak a ni. Kan aiawhte an lo sawm a, an mobile an laksak a. Ashutosh Ranka leh Saurav Das te kha JP Nadda-a inah hren an ni ringawt a ni,” tiin Jantar Mantar-a ni 32 an punkhawm tawhna hmuna mipuite hmaah a sawi.
“Ruahmanna kha engmah lo mai a ni a. Lehlamah min ko va, lehlamah zirlaite chu vuak an ni mek si,” tiin a sawi.
Thawhtanni khan Nadda-a hian CJP aiawh pahnihte chu hmuin sorkar hotute nen an sawiho leh tur thu a lo hrilh a. Hei hi mi sang telin parliament pana kawng an zawh hnu, police nen nasa taka an innawr hnuah a ni.
A tukah Jantar Mantar-ah bawk pung khawm lehin venhimna khauh taka kalpui a ni a. Kawng erawh an zawh zui tawh lo.
Police hian tiang leh tear gas hmangin parliament pana kawng zawhte kha an tilet a, lehlam lehlam hian tharum hmangah an inpuh tawn.
Dipke-a’n sorkar a koh hma lawk hian bâng tura an duh, education minister chuan Prime Minister Narendra Modi-a sorkar chuan thalaite duh leh exam dan siam that chu a ngai pawimawh hle tih a sawi.
Hei hi Pradhan-a’n amah duh lova thalaite inhawr khawm mek a awm hnuah tawngka a neih hmasak ber a ni.
“Kan sorkar hi rorelna ina NEET chungchang leh thalaite thil ngaimawh sawiho turin a inpeih,” tiin Pradhan-ah hian Thawhlehni zan tlai tawh takah khan a X-ah a tar lang.
“Zirlaite hian political campaign nana hman piah lama tha hi an phu a ni,” tiin Thawhlehni chhuna Congress hruaitu, Rahul Gandhi-a leh mi dangte an tel vena chungchang a sawi chhuak.
Gandhi-a hovin eptu, Congress party chuan Modi-a chenna in tualah sit-in protest an huaihawt a. A farnu, Priyanka Gandhi Vadra leh an hruaitu dangte nen police-in lain zan vek khan chhuah leh an ni.
NEET exam zawhna put avanga zirlaiten lungawi lohna hian a kang kai thui tawh hle a, state hrang hranga zirlaite chuan an awmhmunah thlawpna an lantir hlawm a, ram pum a tuam tan mek a ni.