State archives digitization zaa za tih tum a ni – Art & Culture minister
Mizoram State Archives digitization chu sawrkar hmasa hunlai atanga kalpui tan niin, tun sawrkarah pawh an chhunzawm a, zaah za tih an tum tih Art & Culture minister C Lalsawivunga chuan a sawi.
Mizoram State Archives Art & Culture Department leh Pachhunga University College History Department tangdun buatsaihin Zirtawpni khan Pachhunga University College-ah “Seminar on Archives and Social Memory in Mizoram: Challenges and Prospects” tih thupui hmangin seminar neih a ni a, hmanpuitu Art & Culture minister chuan, archives-in hunbi a nei loa, thilhlui dahkhawm mai niloin, hun kal tawh leh tun hun zawmtu pawimawh a ni a. Zirmite puitu leh thuziak danglam tak pe chhuaktu a ni tih a sawi. Kan hnam ral lohna atan records leh document vawnthat a tul tih a sawi bawk.
Mizoram State Archives chuan harsatna tawk mah se, hma a sawn zel avangin lawmawm a tih thu a sawi a. The Mizoram Public Records (Amendment) Act 2024 chu Mizoram state-a thil hlui dahthatna atan a tangkai hle rualin, Act thar a nih avangin Rules siamthat mek a ni tih a sawi. “Khawvel changkang zelah digitalization a pawimawh a, sawrkar hmasaten digitalization bul an tan avangin an fakawm hle. Tun sawrkarah pawh hma lak chhunzawm a ni a, zaa za digitalization kalpui tum a ni,” a ti.
Art & Culture joint director F Lalthanmawia leh PU College principal Prof H Lalthanzara te pawhin archives pawimawh dan leh tih hmasawn zel a tul zia an sawi a ni.
Seminar-ah hian NEZCC Board of Governors member Alfred Zothansanga Sailo chu resource person niin, thiamna hrang hrang neiten thupui thlan bik neiin presentation an nei a. Mizoram State Archives chemist-II C Lalmuanpuia’n “Where Memory Meets Science” tih thupui hmangin, Mizoram State Archives-a intern nilai leh PUC History department zirlai Rachel Lalremruati’n “Seeing History for the First Time: Reflections of an Archives Intern” tih thupui hmangin, PUC History department associate professor Dr Rohmingmawii’n “Navigating Archives: A Personal Research Journey” tih thupui hmangin thu an sawi a. Sinlung Hills Council deputy secretary James Miahlung chuan thu a sawi bawk.
Presentation neih zawh hian sawiho a nih bakah zawhna awmte chhan a ni.