Chelsea fans boo khum hlawh Fernandez
Chelsea fans boo khum hlawh Fernandez
Kumin July thla World Cup semi-final match pakhat zawka Argentina laka England tlawm tumin Chelsea player Enzo Fernandez chuan a eizawnna ram laka a goal khung a lawm a, Inrinni season thar inbuatsaihna match-a a inlan tumin Blues fans-in Stamford Bridge atanga talchuahna zawng mek Argentine midfielder hi an boo khum ve hmak!
March thla atanga a Chelsea hmalam hun chiang tawh lo sa Enzo hian tun nipui thawt tan tirh atang khan Real Madrid zawm dan kawng a dap chho tan a, Spanish club lamin Argentine an hawisan hnuah a agent-te’n Manchester City lam dawr leh mah se Chelsea chuan an midfielder man atana pound maktaduai 120 an chhiar chu an ngam lo niin a lang a, Fernandez duh tur tana karliamta Zirtawpni thleng deadline an siam chhungah an indawr fel hman lo.
Ti chuan, Argentina midfielder pawhin loh theih lohin season thar atana Chelsea inbuatsaihna a zawm a ngai tawh a, Real Sociedad laka 3-1-a Chelsea chakna inkhelah second half chhungin khelmual a lut a, a club vawn lai supporter-te ngeiin an boo khum ta a ni.
He inkhelah hian a club thar Blues tana a inlan vawi khatnaah Morgan Rogers chuan goal khung nghalin, Joao Pedro pawhin pre-season laia a chetthat chhunzawmin west London tan goal hnih a thawh leh a, manager Xabi Alonso squad-a a pawimawhna a nemnghet zel.
Hnehna chang mah se sawi hlawh leh boruak siamtu ber chu Chelsea lama hralhg chhuah theih hun an bithliah chhunga chhuak hman ta lo Fernandez laka lungawilohna thawm thang va niin, minute 62-a khelmual a luh laiin boo khum a ni a; inkhel tan hma minute 45-a squad hming chhiarchhuah a nih lai pawhin Stamford Bridge thleng hmasa hoin a hming ringawt pawh an lo boo tawh bawk!
Chelsea supporter-te ngaihdan erawh a inang vek lo a, inkhel tan hma, khelmual a luh lai leh a ball tawh apianga boo khum an awm laiin a hming lama tantu an awm ve zel tho!
Tarlan tak angin, Enzo Fernandez laka Chelsea tantu thenkhat lungawi loh chhan hi kumin World Cup laia England tlawmna goal khungtu pakhat a nih vang leh chhuahna a zawn tak vang a ni a, a agent Javier Pastore hian eng lam nge a hawipui zel dawn hriat theih a ni rih lo.
England a chhuahsan lo a nih chuan season tharah hian Premier League club dang 19-te pawhin Fernandez lakah hian eng thawm emaw tak chu an chhuah ngei a rinawm!
Tun thlengin Chelsea a cham leh rih dawn nge Manchester City lamin an dawr chhunzawm leh dawn tih a la chiang lo a, September ni 1 khi nipui transfer tawp hun a ni a, inchinfelna hun la awmin a lang a, a manager hlui Enzo Maresca nen Etihad club lamah an inzui tho lo ang tih sawilawk theih a ni rih lo.