Islam Makhachev a ropui zual zel

Pathianni zing khan Philadelphia-ah hlawhtling takin UFC 330 neih a ni a, fight ngaihven hlawh berah Islam Makhachev chuan a kawnghren chuhpuitu Ian Machado Garry chu harsatna tawk lova hnehnin, welterweight kawnghren a humhim. Makhachev hi UFC ah vawi 17 zet a chak zawn a, kum 13 chhung zet record lo awm tawh Anderson Silva siam khumin record thar a siam.
Mixed Martial Arts a nih ang ngeia thiam thil nei chikim tak Islam Makhachev hian amah aia naupang Ian Machado Garry lakah fighter tha chungchuang bik a nihzia a lantir nawn leh. Amah aia sang, ban sei, hnek na leh huaisen Garry hi ngam takin a nawr a, round khatna atanga round nganna tawp thlengin a nawr buai tluan zak. Garry hi a nawr buai hneh theih em vangin ‘engtikah taka Garry hi rek tlawm ang maw?’ tih chu an inbei lai entute zawhna a ni. A khingpui bawhbet fo mah se beisei angin a rek tlawm thei bik lo. Inhneklamah hnufual deuh zawk tura ngaih ni bawk mah se Makhachev hian chiang zeta a khingpui a pet fuh bakah a hnek fuh bawk a, a knock-out teuh hle nghe nghe.
Champion lai Makhachev-a’n na takin nawr reng mah se Garry a huaisen a, fim taka inlanin a talbuai duh bik lo. Inbuan leh tharum-ah chak lo zawk ni zel bawk mah se a inveng thei hram hram zel a, kut tum hmang thiam a nihzia lantiin bichilh tak chungin a khingpui hmaiah a hnek fuh fo va, Makhachev ngei pawh a hmai a rang ve nuaih mai. Fighter tha bik Makhachev laka a inlan dan hian kum 28 mi Garry-a’n hmabak a neih enzia a lantir a, la champion ngei tura beisei a ni.
Fight ngaihven hlawh tak chu beisei lawk sa ang deuha hmuhnawm lutuk lovin a tawp a, champion lai Islam Makhachev chuan a kawnghren chuhpuitu Ian Machado Garry lakah point 49-46, 49-46 leh 48-47 in hnehna a chang a, welterweight kawnghren a kawl mek a humhim a, UFC-ah vawi 17 ngawt chak zawnin UFC a chak zawn rei ber record a siam ta hial a ni.
Kum 34 mi Islam Makhachev hian UFC-ah fight vawi 30 zet a hmachawn tawh a, vawi 29 chak zawkah tangin, tlawm zawkah vawi khat a tang tawh. Lightweight huangah champion a nih hnuin Welterweight lamah a insawn a, division hniha champion thei tlemte zingah a tel. Discipline dang dangah thiamna ril a nei tha hlawm a, thahrui a lo nghah kher bawk nen fighter tha tak takte pawhin an chai hleithei meuh lo a ni ber mai. Fighter tha chungchuang a ni a, vawi 17 zet a chak zawn ta bawk nen UFC a pound for pound-ah fighter tha ber a ni chhunzawm zel.
Makhachev lakah uiawm taka tlawm Machado Garry khan UFC-ah fight vawi 19 a hmachhawn tawh a, tlawm zawkah vawi hnih a tang tawh. Kum 28 mi chauh a la ni a, world champion nih theihna hun tha tak a la nei.