Defence minister-in Sri Lanka tlawh, president kawm

Sri Lankan President Anura Kumara Dissanayake chuan Colombo tlawh mektu, Defence Minister Rajnath Singh nen an inkawmnaah an ram chu India himna tiderthawng thei tana hman an phal loh thu hrilhin ram venhimnaa an thawhhona tihchak zel nan inremna chi thum an ziak a, heng zingah hian India-in a pek Sri Lankan Air Force-in an hman air-defence gun tihchangtlunna tur pawh a tel.
New Delhi hian Chinese sorkar enkawl bank-te atanga a thenawm ramin pawisa an puk atanga hmunhma tha an din chu a duh lo hle thin a. Heng zingah hian Sri Lanka-a Hambantota lawng chawlhna pawh telin Colombo-in ba a pek theih loh avangin kum 2017 khan kum 99 chhung Chinese thunun turin an pe a. Ram acre 15,000-a zau lawng chawlhna chhehvel pawh an hmantir tel.
Defence minister leh Sri Lanka president hian ral atangin Indian sipaiten an sak Bailey bridge pathum an hawng bawk.
Indian defence ministry thuchhuah chuan, “Ram pahnihte hian Sri Lankan Air Force-te hman tur L70 gun tihchangtlunna tur leh National Cadet Corps (NCC) leh National Defence Colleges (NDC) thawhhona tur MoU an ziak,” a ti bawk.
Singh-a hian Thawhlehni khan Colombo thlengin ni thum a châm dawn a, Nilaini khan president nen inbiain tuipui himna leh ram venhimna lam thila thawhhona tihchak dan tur an sawi.
Dissanayake-a hian India-in Cyclone Ditwah a thawh hnua Operation Sagar Bandhu hming pua a puihna te, New Delhi-in thliarkar ram hmun hrang hranga thil chhiate tun din lehna tura sum tam taka a puihna avangin lawm thu a hrilh.
“Thenawm hnai leh tuipuia kan thawkho an nih angin India leh Sri Lanka hian ram leh mipuite thatna atana thawhho zui zel tha an ti a. Himna, muanna leh than duanna atana a hmaa an lo kal tawh dan ang zela kan tha an ti thar leh a ni,” tiin Singh-a chuan a ti.
Hruaitu pahnihte hian ram pahnihin chona inang an neih hmachhawn dan tur te, inkungkaihna tha zawk leh inrin tawnna tha zawk a awm theihna turte an sawi dun tih defence ministry chuan a sawi.
L70 gun paruk tihchangtlunna tur MoU hi India sorkar puihnaa tih tura ziah a ni a. “Hei hian Sri Lanka-a boruak lama invenna nasa takin a tichak dawn a. Heng air defence gun-te hi Sri Lanka Air Force hnenah India-in a hmaa a lo pek tawh a ni,” an ti.