A title humhim tura hmalam pan zel Sabalenka, Battle of the Billionaires’ hnehtu Pegula
Battle of the Billionaires’ hnehtu Pegula
US Open women’s singles title hnuhnung pahnih kawl mektu Aryna Sabalenka chuan a tum thumna atana title lak leh a tumna kawngah ke a chhep sual duh lo a, Thawhlehni zan inbeihna hautak zetah 7-6 (7-1) 3-6 7-6 (10-7)-a Linda Noskova hneh hram chungin semi-final a chuangkai leh ta nge nge a, tah chuan tawhkhirh bawk tura beisei Jessica Pegula a hmachhawn zui leh ang.
Grand Slam singles title pali hawn tawh Belarusian hian US Open lallukhum a hloh tawh mai dawn emaw a intih hman rum rum thu leh beidawn thuak tawh lama hnehna a sualchhuak leh thei kha sawifiah dan pawh a hriat loh thu sawiin, kumin tournament-a deciding set a khelh thlen vawi khatnaah a dinhmun a derthawng hman tih a pha bik lo.
Kum 28 tan tun kha US Open bika match 19 a chak zawnna ni tawhin, Flushing Meadows-ah hian kum 2023 final hnu lamah khan chak loh a la nei leh ta miah lo a, kum 2016-a record siamtu Serena Williams hnu lama hmeichhe player zinga a zawna New York major semi-final tum ruk lut leh thei hmasaber a ni.
Noskova laka a result avang khan world number one ranking a kawl mek pawh a nghet leh ta sawt a, mahse, nizan quarter-final match dangah Elena Rybakina chuan Zheng Qinwen hneh se No. 1 nihna hi la hloh leh thei a ni.
Inkhelh bana zawhna an zawhah ranking-a chungnungber a nihna chu hloh pawh ni se US Open title a humhim leh chuan a lawm tho ang em tih zawhna chu, “Hlim tih piahlam a ni ang chu, vawi thum champion nawn thawm tluka ropui a awm thei dawn em ni?” tiin a chhang!
Sawizawmin, “Title vawi thum la zawn thei dinhmuna ka la ding chhunzawm ta zel hi ka lawm takzet a, a tak leh tun inkar erawh a la hla tho mai,” a ti.
‘Battle of the Billionaires’
US Open final tum li khelh zawn a tumna kawnga Sabalenka hmachhawn tur American third seed Jessica Pegula chuan last eight inkhel dangah 3-6 6-4 6-3-in a chipui Emma Navarro a hneh a; American sumdawng hausa tawntaw ve ve fanute pahnih inkhel hi ‘Battle of the Billionaires’ tiin media lamah tarlan a ni.
A zawna US Open semi-final tum thum lut tling ta Pegula leh two-time defending champion Aryna Sabalenka-te final luh inchuh tur hi 2024 final rematch a ni dawn a, Pegula tan world number one nihna kawng a inhawng ve mek bawk.
Chu mi thleng tur erawh chuan American hi a champion ngei ngei a ngaih piah lamah nizan result tarlan hman lohah Elena Rybakina chuan semi-final a thlen zawh loh a ngai tel bawk.
Kum hnih kalta New York major final-a Sabalenka hneh loa runner-up lo ni ve tawh Pegula hian 26th seed Navarro lakah set khatna hloh mah se set hnuhnung pahnihah harsatna lian a tawk zui lo a, a zawna a tum thumna atan a home slam-ah semi-final lut lehin, kum 32 mi ni tawh chungin major title la thei dinhmunah a ding chhunzawm leh mek.
Thla 12 kalta pawh khan semi-final stage-ah bawk Pegula kalkawng hi Sabalenka chuan dansak tawh bawkin, kuminah an intawng nawn leh dawn a; quarter-final lama fiahna lian paltlang hlimhlawt ve ve an nih avangin taksa leh rilru lamah an rimtawng dun hle a ni.
American number one Pegula hian kumin Jnauary thla pawh khan Australian Open final thleng tawhin, major final han luh mai hi chu a thiam lo pawh a ni lo, va champion lai tak hi a mutan a ni rih a; tuntum hian kum hnih liamta chhunga a kawng daltu ngi bawk kha last four-ah a su leh dawn a, eng tak ang leh ang maw?
A chipui Navarro a hmachhawn boruak kha Pegula hian a sawi thiam angreng a, “Vawiin hian ramhuai tam tak ka hmachhawn a ni,” a ti chuan entu mipui lawm a hlawh hle!
Pegula hian comeback hnehna tum 48 chang tawhin, three-sets inbeihnaah vawi 90 dingchang zawkah a tang tawh bawk a, tunhnai kum 10 chhungin he chak dan pahnihah hian ani aia chungnung WTA player zinga an awm loh avangin a hmachhawn leh tur Sabalenka lakah pawh inrintawkna thuk zawk a nei turah ngai ang.