John Cena’n naupang damlo 650 duhthusam tihpuitlin sak

John Cena’n naupang damlo 650 duhthusam tihpuitlin sak
John Cena hian a wrestling leh Hollywood career-ah mipui tam tak punkhawmna stadium-a leh film set velah vawi tam a lo inlan tawh a, hetiang karah hian mi hriat lar loh ruamah naupang natna khirh zual tuarte tana inhmangin a fehchhuak nasa hle bawk.
2002 atang tawh khan he American wrestler leh actor ni bawk hian Make-A-Wish Foundation thawhpuiin, naupang natna khirh zual tuarten an duhthusam an chakzawng te an tih theih nan hun insiamin a thawk chhuak thin a, hetianga a fehchhuahnaah hian naupang damlo 650 te duhthusam tihpuitlin sak turin a che chhuak tawh a, Guinness World Records pawhin milar zinga naupang damlo te chak zawng leh duthusam tipuitlin sak tam berah a puang a ni.
John Cena hi hetiang kawngah hian milar zingah tuman an tluk pha lo a, heti lam hawi charity-a a inhman nasatna avang hian Guinness World Records ICON zingah an telh ta a, Guinness World Records 2027 bu tharah pawh a lang dawn ta a ni.
Cena hian professional wrestling hi 1999-ah a luhchilh a, chuta tanga kum thum, 2002 atangin Make-A-Wish nen an thawkho tan nghal a, chutihlai chuan tun angin a la lar lo. Mahse, WWE lamah a hlawhtling a, khawvelin a hmelhriat a, lemchan lamah pawh Hollywood-ah te a intat lut ta zel a, tunah chuan entertainment khawvelah John Cena hre lo kan vang viau tawh ang.
Make-A-Wis Foundation hian naupang kum 2 le kum 18 inkar, natna khirh leh enkawl harsa bik neite duthusam an theih ang anga tihpuitlin dan an ngaihtuah thin a. Naupang damlo thenkhat chuan a taka milar hmuh te an chak a, thenkhatin eng event emawa kal an duh a, thenkhatin gift dawn leh midang thilpek te an chak ve thung a, hetiang hian an duh leh chak zawng pawh a inang lo thei hle a ni.
Guinness World Records-in an tarlan danin celebrity zingah Make-A-Wish Foundation ngenna tihhlawhtlin sak kawngah vawi 400 aia tam tihlawhtling thei midang an la awm lo a, an pawl hian kum 42 hmel an hmu ve tawh a, hetih chhung hian milar zinga an ngenna tihhlawhtling ngun ber chu John Cena hi niin, naupang damlo zingah pawh Cena hmu chak an tam ber niin an tarlang bawk.
John Cena hian Make-A-Wish tan chuan engtik lai pawhin an inhawng reng tih a lo puang tawh a, “Hetiang thilah hian min mamawhna in nei a nih phawt chuan, ka laklawh em tih lam ka ngaihtuah lo, ka thil tih lai chu engpawh ni se ka kalsan nghal zel mai ang,” tiin inthlahrung hauh lo a be pawp thin turin a lo sawm tawh bawk a ni.