A CLOSER WALK WITH ORGANIC FARMING – 29

RK Dawla
Mb 9366095658

July thla tâwp lam niin, khawchêng leh chhûm zîng nasa, leilung lumna nasa leh boruaka hnâwng tam hun vanglai a ni mêk a. Hetiang hunah hian thlai natna tam tak a lo lang chhuak thin a. A bikin lei hâng tam lo leilunga thlai chi khat chin nghek (high density monoculture) ang chi-ah khan. Kan ram ang leilung nghet lo leh naupang, sik leh sa inthlâk nasa tak thin karah chuan, harsatna a thleng sam êm êm. Hei vang hian hlâwk leh tlo taka farming kan kalpui dawn a nih chuan, hmun zim zawka tharhlawk dan kan zawn thiam a pawimawh chho hle. Tutenemaw, “Kan ramah chuan engkim a tha thei” an ti liam satliah ringawt hi a taka thawktu tak takte chuan a nih lohzia thla tin, kum tin kan chiang viau âwm e.
Kan ram leilung mil tur thlai kan thlan thiam leh kan sik leh sa mila leilung kan enkawl thiam hi tu tân pawh a pawimawh hmasa vek a. Hemi kal kân hian eizawnna nghet leh tlo din a har hle ang. Hmun tam takah terrace farming-te pawh kan practice thin a. Mahsela, ranvulh nena che kawp lo tân chuan, a hautak êm êm a, lei a chhiat/dâk chak avangin kan pamtul leh fo thin. Terrace farming kan buaipui dawn a nih chuan, kum tina leitha dahluh ngai zat leh hmun leh hmuna leitha kan siam theih dan tur kha ngaihtuah fel hmasak a tul thin. Chumi ngaihtuahna tel lo chuan, terrace laih thar mawi tak khan lawmna min thlen rei lo. Mahsela, kum a ral a, leilung a dâ a, natna a puang a, kan zuzi leh mai thin. Ngaihtuah hmasak tur kha ngaihtuah hnu-hnunah kan neih ta thin a, heti lai tak hi a fuh lo lai chu a ni thin.
Thlai kumhlun chingho zingah pawh – Ram kan vât duai a, kumkhat thlai chingin a kârah thlai kumhlun kan phun zawk zawk a. Nakina thlai kumhlun an len huna an eitur lei hâng kalral tur ven lâwkna tur te, natna leh rannung puang an do theih nâna thlai chinpawlh leh thal nat laia tuipêk or hnâwng siamsak dan tur tih lam kha rilru-ah a lang vak lo. Engzatnge kan phun theih ang, tin chuti hmunah chuan kung chuti zat chu a leng a…tih vel kha kan ngaihtuah vel chauh thin a. Nikhua a lo rei a, kum 15-20 a lo liam chuan, kan huan thlai chinna leilung a da ta hle a. Chu chuan thlai natna leh chaw tlakchham chi hrang hrang a rawn thlen ta a. Chutih hunah chuan, han tang tak tak turin kan rilru leh thâ-in a lo tlin tawh lova, thlai natna leh harsatna lo thleng pawh kan sepui ruah tuar ta tlawk tlawk mai thin. Hei hi a pawi êm êm a, Mizorama sum chang thlai kumhlun chingte harsatna lairil ber chu hei hi a ni tlangpui. Thlai ringawt focus lovin, a tona leilung leh envinronment kha ngaihtuah hmasak a pawimawh zawk tih hi huan siam thar turte zawng zawng chuan hre vek ila a tul hle.
Tin, farmer ten an theih bâk thil a awmin, sawrkar leh line dept an chhawr tak tak lo fo thin. Kawng lehlamah chuan, Minister/MLA leh Dept dawr hman ber berte hi kuthnathawk tak tak an ni lo tlangpui a. A mamawhtu tak tak, kuthnathawktu zawkte chuan chawlhkar dawn dawn ofis dawr tura hun sên kha an hman awkawng lo mai a. |henawmte inneihna leh khawtlanga chhiatni-ah pawh, loh theih loh nia an hriat avangin an awm thei hrâm a ni chauh a. Kan sawrkar hruaitu leh line dept hotute pawh hian hei hi hria se – ‘Farmer tak takte hi chuan, ofis an rawn thleng mang mang lovang. An hman lo! Sawrkar atangin puihna engtenge awm thei pawh hre lo khawpin an hah a, an lawm tâwk a tam lo êm êm. Chuvangin, sawrkar leh dept hotute hian ram hmasawnna tak tak kan duh a nih chuan, heng farmer inthup tam takte hi chakai khawrhin khawrhchhuak zawk sela. Ruling power tih vel hmanga tanpuina dawng thei tak takte hi mi hlawhtling an ni ngai tak tak chuang lo!’ Mamawhtu dik tak hnena a mamawh tak thlensak hi thil pawimawh takzet a ni e.