Russia-in infiammite hlawhtlintir atchilh?

Russia-in rawng taka Ukraine a run chuan kum hnih hmel a hmuh mek laiin a infiammite chuan international sports field-ah inlan leh tumin hma an la.
International Olympic Committee (IOC) chuan Russia leh Belarus atanga infiamite chu international competitions-ah ram aiawh ang ni lovin mimal neutral ram angin an tel thei a.
IOC thutlukna hi Ukraine tan chuan pawi thei tak niin Russian infiammite an tel phal lo bur tura ngentu a ni a.
Ram dang ang bawkin Russia hian international sport te chu an rama infiammite theihna sanzia pholan nana hman duh thin a ni a.
Russia danglamna chu sorkar leh sipaite chuan award-winning athlete an neih theih nan an kal thui ngam hle a, doping programme nasa tak pawh an kalpui duh mai a, hei vang hian Russian infiammite chu an tel ve phalsak loh an tam phah hle bawk.
Wimbledon pawhin Russian leh Belarus tennis players te chu an ram hruaitu leh sorkar te chet lak dan an thlawp lo a nih chuan an tel ve a remti ta bawk a. Chutih lai chuan Ukraine infiammi Elina Svitolina chuan ‘pawisawi lo Ukrainians te an thih chhung chuan’ Russian infiammite tel ve phal lo turin a ngen thung.
Russia-a Defence Ministry chuan hun rei tak ata tawh programme turu tak kalpuiin chumi hmang chuan infiammite chuan khawvel huap pawhin hlawhtlinna turu tak tak an lo neih theih phah tawh a ni.

-- Advertisement --

Sipai nena inzawmna
Russia sorkarin infiammite tana hmalakna a kalpui langsar ber chu Central Sports Club of the Army (CSKA) a ni. Coach za tel ruaiin Russia ram an tuam a, infiammi 10,000 chuang training an pe.
He club hi kum 100 dawna upa ni tawhin Tokyo Olympic 2021 ah pawh khan Russia-in medal a hawn tam ber te chu he club member te hlawhchhuah hi a ni.
Tokyo-ah khan Russian athlete te chu TEAM ORC (Russian Olympic Committee) hmingin an tel a, a chhan ber pawh state-sponsored doping vangin national team te chu an tel ve khapsak an nih vang a ni.
Defence minister Sergei Shoigu chuan military athletes te chu competition neih zawh hnuah hmua award pein Olympic leh hun atana inpuahchah turin a ti nghal a. “Hun khawhral thei in ni lo, inbuatsaih lehnghal rawh u” a ti a, “Game leh atana in inpuahchah that theih nan kan tihtur kan ti ang,” a ti bawk.
Russia military nena inzawmna nei sporting programme langsar tak bawk chu DOSAAF (Volunteer Society for Assisting the Army, Aviation and Fleet) tih niin kum 1920 chhova din daih tawh kha a ni bawk. Russia defence ministry chuan DOSAAF hi a enkawl niin general in a thutchilh ngat a ni.
President Putin chuan ‘real school of bravery’ tihialin a sawi a, he hmun hi military commander, cosmonaut leh pilot-te chherna a ni bawk.
DOSAAF han Olympic medalist tam tak chher chhuak tawhin chung zingah chuan Tokyo Olympic-a Russian infiammi gold la hmasa ber Vitalina Batsarashkina pawh a tel a. A gold medal lak hnuah DOASSF chu ‘ram hmangaihna lantirna sang ber’ tiin a sawi nghe nghe.

Doping
Russia sorkarin infiamna lama chakna chan a duhzia chu a infiammite damdawi chak hmanga a tihchakna programme a kalpui danah a lang a. Sochi 2014 Winter Olympic hma khan hmuhchhuah a ni hlauh a.
Khami kum November thla khan World Anti-Doping Agency (Wada) tena chhui chianna an neihah Russia chuan inbumna nasa takin a kalpui’ an ti hial a. Infiammite sample lain laboratory-ah Russian sorkar chu a inrawlh thuk hle a ti.
Kum 2016 khan McLaren report tih mai Wada-in a chhuitir chuan Russian infiammi 1,000 chuang zinga Olympic medalists te pawh telin state sponsored doping programme kum 2011 atanga 2015 ah an tel vek a ti hial a.
Hei vang hian Russia chu international competition hrang hrangah a tel ve khap a ni ta a ni. Moscow erawhin a infiammite damdawi hmanga a tichak tia puhna chu hnawlin a pha thung.
Eng vangin nge Russia sorkar chuan sporting arena-a chakna chan a atchilh em em? Russia chanchinbu lar tak Vedomosti chuan Russia sorkar chuan infiammite chu thil a duhawm loh laia Russian-te tihlima inlungruala siam tura a duh vang tiin a sawi a.
“Chakna chan kan mamawh a, chakna hi state policy zinga tel a ni” tiin tarlan a ni. Chumi tur chuan doping kalpuite chu a hreh hauh lo va, mahse, hriatchhuah a nih tak hnuah hrem a tawk ta a ni.
Russia ice hockey player lar tak leh Olympic champion tum hnih ni tawh Vyacheslav Fetisov, tuna United Russia party a MP ni mek chuan, “International sport history ah chuan ram hmuhsitawm tak kan ni,” tihialin a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More