By RK Dawla
Mb 9366095658
-- Advertisement --
1. March ni 13 a ni a. Sawrkarin lo hâl hun a ruat kan pêl fel tep a. Chutih laiin hmun tam takah mei kâng thâwm hriat tur a awm deuh reng a. Ramngaw tha lai kum tin vât a, hâl duai duai kan la uar chhung hi chuan, eizawnna ngelnghet lo chi buaipui kan la tam thawkhat tiin sawi ila, kan sawi sual tampui lovang. Huan kumhlun enkawltute pawhin, kahpaha thlai hmun tur ilo kan la vât cheu hi a veiawm takzet a. Hmunhma kumhlunah thlai thar kan zir a ngai takzet. Kan tunlai khawvel awm dan leh kan farming system hi a inhal lo zâwnga kalpui a va hun tawh tak êm!
2. Mizoram zim tê hi, mihring kan thâwl viau a. Ram erawh kan tâwt viau a ni àwm e. Ren baksak lova kan environment kan tihchhe thin hi kan hmabâk a ko hle mai a. Ramngaw awm hle hle lai kan tukdar a, kan tukdar loh kan tikâng thûl! Heti rêng rêng hi chuan, Zofate hmakhua hi a êng tak tak thei lo. Thlai thar that ringawt a pawimawh lo, kan tuihna leh boruak thianghlim min siamsaktu ramngaw tha kan neih si loh chuan, nuam kan sa rei lo tawp ang. Van ruahtui ring ngar ngar a, hmun tam zawk awihtlan enkawl kan nih vang hian, sik leh sa danglam hlek kan tuar hmasa zel dawn a. Hei hi a ni – issue pawimawh hmasa chu. Keimahni, kan eitur leh kan environment-te hi inhne tlat, inhne reng tur, balance taka khawsa tlâng tur kan ni a. A khawimaw ber hi a uchuak a nih chuan, a dang hi a thalo zawngin a nghawng zel dawn a ni.
3. Thei leh thlaiah vutbuak leh hmuar dum natna a inlâr tan leh fo thin. Hêng control nân hian fungicide chak pui pui hman kher a ngai lova. Copper leh Sulphur tel kher lovin, hêng natna rawn inlar tir hi chu wood vinegar (meihawl tui) hmanga kahin a dam mai thei thin. Copper (Bordo, Copper hydroxide, Copper oxychloride) leh sulphur-te hi, organic ni chiah lo mah se, season khata vawi hnih khat foliar atâna kan hmang a nih chuan, organic-ah chhâl an ni a. Organic compounds erawh an ni lo chiangkuang e. Rannung tenau thenkhat leh thlai bawhtu hmuar hrik naran tam takte hi chu, wood vinegar hian a enkawl theih êm êm a. Organic a nih avàngin leilungah pawi an khawih nêp bik êm êm bawk. A nazawng leh thlazena copper leh sulphur hman hian, leilunga hrik tangkai tam tak a tihlum a, hei hian kan thlaite a tiderthâwng hle thin. Kan thlai enkawlna tur hi mi sawimawi leh fak apiang hi a tha ber lova, kan leilungin a tawrh dan tur hisâp tel ngeiin damdawite hi hman thin tur a ni.
4. Thlai kumhlun tam tak an pâr mêk a, a then an sên tan bawk. Tun ang hun laia mi tam takin kan hriat thelh fo chu – kan thlaiten chaw ai mahin tui an mamawh zawk. India rama lum chak ber state kan ni mêk a. Hemi awmzia chu kan leilung a khawro nasa telh telh a, leiin tui a pai tlem telh telh tihna a ni. A nihna takah chuan thlasik vanglai atanga thlai kumhlunte, tui kan pêk hian thlai zung a insiam tam a, leia thlai chaw tam tak an active a, pawn lam atanga kan barh luhte aiin kori a tu zawk! Hun lokal zel hian hei hi a rawn tidik zel ang. Leia hnâwng hian thlai chaw a eitir chauh a ni lo. Leia thlai chaw siamtu hrik tinrêngte a tiphûr tel zawk a ni. Thlasik leh thal khawro lai ber pawha hnim hringin leilung a khuh huante hi, kan la awt tulh tulh dawn a. Smart farmer chuan farming system-ah priority pêk tur a thlang thiam tur a ni.