By RK Dawla
Mb 9366095658
-- Advertisement --
1. Nipui a thaw tan dêt dêt a, thlasik zan rei kha a tawi telh telh a, March ni 20 hian chhun leh zan hun a inchen chiah (Spring equinox) dawn a ni, keini Northern hemisphere-a awmte tân. Tun ang hun hi thei tang kolom hun lai tak a ni tan bawk e. Thlai chawr thar chhuah tan hun lai mai ni lovin, a kungpui than uar lai (peak cambium season) a intan bawk. Thingkung kan zaibun chuan, a khawi lam lamah pawh, kan zai bunna laiah khan ze bial (ring) kan hmu thin ang. A ze bial chhah zawk kha tun ang hun laia thing tihrawl insiam a ni a, a pan zawk kha favang laia insiam a ni thung.
2. Khawvel huap Scientist ropui, Albert Einstein khan heti hian a sawi a. ‘Khawvel harsatna hi darkar khat chhunga chingfel tura tuk ni ta ila, minute 59 chu, chu harsatna zirchian nân chuan ka hmang ang a, a chinfelna tur chuan minute khat bâk a ngai tawh lovang’ tiin. Farmer tam tak hian an harsatna an zir hman lo hle tih ka hmu a. Tam tak phei chuan hman pawh nise an peih lo! A kah damna/a chinfelna a rang thei ang bera hriat a, kah dam vat kha an thupui a ni tawp! Inven leh natna/eichhetu rannung chanchin ngaihven tul ti lote hi chu an damchhungin hmasawn tih a awm tak tak dawn lo niin a lang. Mizote tawngkam lâr tak pakhat chu, “Tluang leh tluang lo” hi a ni. Kan tihfuh rei deuh khan tluang kan intia, kan tihfuh vak loh chhoh chuan, tluang lo kha a ni leh mai a. He ngaihdan mawlmang, tluan chhan leh tluan loh, a chhan zir pawh awm si lo, rilru fahrah hi thlawhna phurhtir a, Morocco thlalêrah zuk paih daih a ngai a ni.
Pathian hian kan zir a, kan sutkian turin harsatna min pe thin, kan hêl turin min pe lo. Sal chhuahtu ropui Abraham Lincoln-a politics zinkawng kha a tluang lo nasa êm em khawp mai a. Kan ngaihdan ang pu mi chu nise, a hming pawh kan hre hauh lovang. Chutiangin, khawvel huap sumdawng hlawhtling, scientist leh mi hlawhtling dang tam takte pawh hi, harsatna-in a chher len an ni thin. Harsatna (obstacles) hêla tlanchhe chhuanlam ngahho hi khawvel khawi laiah mah mi hlawhtling tia sawi an ni ngai lo. A chhan chu an hlawhtlinna tur ber zirlai, an harsatna kha zir a, hneh tum lovin an tlansan daih alawm!
3. Assembly session kan nei tan mêk a. Farmer-te chu cheng 25,000 sema lawm viaua sawi a ni khan ngaihtuahna a tithui hle. Kum 35 zet state puitling, population tlêm tê, chuta mi tam ber farmer-te tâna sum heti zât lek a la lawmawm viau hi enge i ngaihdan? Kan lawmna thlentu thil len leh têt dan hian kan dinhmun a tilang chiang viau lo vem ni? Naupang Krismas bazar nân leh kutdawh hnêna pêk atân pawh ni lo, eizawnna bultan nân chuan sawi ngam chi pawh a ni dawn em ni? Hetiang lekte chu Tuikuk regugee pawh pe ila, an lungawi awkawng lovin a rinawm.
Ram hnukpui ber kan eitur tharchhuaktute hian dinhmun tha zawk leh thlir dan zahawm zâwk chu an phu chiang mawle..Kan tharchhuah tinrengah price support leh insurance pawh kum 35 chhunga la nei thei miah lo State hian, kum 5 chhung chauh atana kan aiawh tura kan thlante hi i hlauvin i tlawn chung tawh lo teh ang u. Min hlau zawk tur an ni asin! Car changkang leh in leh lo ropui an neih vang ngawtin an rilru a changkang chuang lo a ni tih an khawsak phungah kan chiang tlang a ni lo’m ni? Lirnghing nat theihna lai, Zone 5-a in leh lo khir tak tak neih a, tuihâwk system mumal awm thei lêk lova inchhek hi changkanna a ni chiah em tih chu hunin a la hril ang chu mawle…