A hmunin zir, mihringin zir…?

India rama National Paragliding Training Programme hmasa ber chu tun hnai khan Champhaiah hawn a ni a, he programme hi NEC, Ministry of DoNER sponsor niin, GAD (Civil Aviation Wing) leh Mizoram Aero-Sports Association (MASA) te huaihawt a ni.
Kum 2020-ah Paragliding Accuracy World Cup kan thleng a, kha khan rah tha a chhuah chho zel dawn ni te pawhin a ngaih theih a. Ram pum huapa Paragliding Training neihna tlaka ngaih kan ni hi a lawmawm hle a, hetiang training neihna tur hi chuan a hmunhma pawh uluk taka zirchian a ngai thin. Zir chian a nih hnua training neihna tlak hmunhma kan nei hi tangkai taka chhawr tangkai zui kan tum a paiwmawh dawn hle niin a lang.
Lei hrul lama infiamna chi hrang hrangah Mizo ten ram pum hmelhriat kan hlawh chho mek a, boruak lama infiamna chi-ah pawh kan duai lovang tih a rin theih a. Boruak lam sports-ah pawh a hmunhma kan nei tha tih chu tuna national programme kan thlen theih atang hian a chiang reng mai.
Hetih lai hian, aero sports neihna hmunhma lamah buaina a awm lo kan tih mek lai in, a hmunhma hmang tangkaitu a mihringa te zawk hian kan zir em? tih lam hi inenfiah kan mamawh niin a lang.
A chhan chu, kum 6 kaltaah khan Swadesh Darshan Scheme hnuaiah aero sport hrang hrang dinna tur project tha tak tak Mizoramin a dawng a. Muthi-ah cheng nuai 900 chuang hu Paragliding neih theihna tur project chu tun thlengin tihhlawhtlin a la ni lo va. Tuirial Airfield-ah aero sport hrang hrang heng — paragliding, parasailing, paramotor, powered hand glider, hot-air balloon tih theihna tur project cheng nuai 2,139 hu chu tun thlengin a nihna tur angin puitlin a la ni lo bawk a. Sawrkar laipuiin hetiang dinna tur sum tam zawk (90:10) min tumsak theih laia kum 5 liam tawh hnu pawha tihhlawhtlin a la nih loh hi chuan, a hmunhma nei tha mah ila, a mihring lamin kan zir lo a ni, tih tlak hial kan ni awm e.