Tawipui South-ah leiminin in 4 hnawl

Lunglei district-a Tawipui South-ah July 14 zing khan lei a min a, chenna in, hotel leh dawr pakhat a hnawl a, mihring thi leh hliam an awm lo.
Thudawn danin, Tawipui South leiminna hi July 11 vel atanga che tan tawh a ni a, a bulhnaia chengte an lo inring lawk tawh. Ruah tla zelah July 13 zan dar 11.00 vel atang khan a che na leh tan a, July 14 khawvar hma deuh khan leimin hi a nasa zual a, hotel pakhat, dawrte pakhat leh chenna in nen in pali a hnawl thluk bakah National Highway-54/2 kawngpui a hnawh ping a ni.
A kaihhnawih sawrkar department aiawh, Tawipui South khawtlang hruaitute leh helai kawng sial hna thawka awm mek ABCI aiawhte chu an inrawnkhawm a. Lei min dan leh min belh thei a la awm leh awm loh, lirthei kal theiha kawngpui titlang tura hma lak dan tur enhoin, leilung a ngheh tawk loh avangin leh lung leh lei ala tlak belh reng avangin mihring leh khawl tan him lo thei a ni a, venthawn thilah lei tla paih fai hna chu thawh rih loh nise, an ti.
Lei tawlh vanga in leh lo chhiat tawk chhungkuate tlawh nghalin, sawrkar atanga tanpuina leh chhawmdawlna awm theite ruahmanin an bawhzuisak a. Khualzin tangkhangte ei siamsakna leh senso dang phuhrukna atan District Disaster Management Authority Lunglei atangin Rs. 20000 chu Tawipui South VC leh YMA kuta hlan a ni bawk.
Lunglei district thuneitute chuan leimin tuartute chhawmdawl kawngah mipui himna tur leh kawngpui tihtlang leh thuai a nih theihnan ruahmanna siamin an vil reng a. Inspection Team-in lei tla paihfai a nih hmain lung lian leh nghet lo zual hal darh phawt nise tia a rawt angin, Lunglei DDMA chairperson, bawrhsap Navneet Man chuan vawiin – July 15 hian lung hi hal darh turin thupek a chhuah a ni.
Kawng hi thenfai ala nih loh avangin lirthei tan paltlang theih a ni rih lo tih thu dawn a ni.