A khaw mite’n raltlante en hrang lo

Parva III khuain raltlan an mikhual mek a, anmahni nen an mikhualte hi an inzat thuak ang. A awm awm an intawm a, a khaw mite hian an en hrang lo.
Lawngtlai District-a Parva III hi in 60 khua an ni a, raltlan an hnena awm mekte hi chhungkaw 45 an ni. Relief camp-ah chhungkaw 34 an awm a, kar hmasa Ningani khan chhungkaw 11 an thlen belh leh. A thleng tharte hi VC Hall-ah an awm rih.
“Kan en hrang lo, kan unaute an ni a, kan inhre tha a, a khaw mi angah kan ngai,” Parva III YMA president Rinsangpuia chuan a ti.
“Chhung leh khat kan awm nawk a, tin, kan inhmelhriat tha a. Inhre sa vek chu kan ni lo a, a tam zawk chu kan inhmelhriat sa ang,” a ti bawk.
An raltlan mikhualte hi Bangladesh-a Chittagong Hill Tracts atanga tlanchhia an ni a, Parva III leh an chhehvel khuate nena lo inhre sa, chhungkhat pawh awm nawk an ni. An inkalpawh reng reng a, Mizoram lam atang pawhin an zin thla fo.
“Kan neih ang ang kan intawm a, a tlem a nih pawhin kan insem mai a,” Rinsangpuia chuan a ti a, tui an ngah loh thu leh, chu pawh raltlante nen hian an insem mai thu te a sawi.
A sawi danin, Parva III khua hian tanky pakhat an nei a, chu chu an khua hian an tla tawk. Anmahni zat thuak mikhual an nei ta a, tui a pung ve si lo a, tui hi an ngah lo. Mahse khawtlangin an sem rual a, raltlante nen hian an inhman tawm thin.
BSF-in an thutchilh thu a sawi a, raltlante hi BSF hian khaw chhuahsan an phal lo tih sawiin, tuikhur leh dai hnaia an kal pawh an phal lo a, an veng reng tih a sawi.
BSF vang hian an khaw mipui pawh an chep tih a sawi a, ramhnuaia kal tur pawhin Aadhar card ken a ngaih thu leh BSF-in an lo endik thin thu te sawiin, “|awng kan thiam lo bawk nen, min tichep khawp mai,” a ti.
Thawhtanni khan raltlante thing phurhsakin YMA an hnatlang a, hnatlang chhuak turte pawh BSF-in an lo dan thu leh rei ngial an inhnial thu te a sawi a, raltlante’n khua an chhuahsan ang tih an hlauh avang hian BSF hi khaw mite lakah pawh an khauh tih te a sawi.