A ngaihna hriat

Tunhnai khan Women’s Polytechnic Aizawlah Eco Club leh NSS te chuan, ‘Art & Craft from Waste Fabric’ tih thupui hmangin workshop an huaihawt a. Paih mai tur, hnawksak leh bawlhhlawh chang mai tur Puanchhia kan tih mai atangin thil tangkai tak tak heng — bag chi hrang hrang te, in chei nâna hman chi târ mâwi, in chhûng tihfaina hmanrua leh thil dang chi hrang hrang an siam chhuak a.
Pawnchhia kha bawlhhlawh anga paih ni ta se, sum leh pai, hun leh tha tam tak sen ral a ngai a. Zingah bawlhhlawh paih motor a lo kal hun lo chan a ngai a, hun kan seng phawt. Bawlhhlawh phurtu lirthei rawihna pawisa kan thawh a ngai a, sum sen a ngai leh bawk. Bawlhhlawh sawngbawlna hmunah thliar fel a lo ngai leh a, a kalkawng a thui hle a ni. Pawnchhia paih lova thildanga hman tangkai tak hlauh ang hi, ‘a ngaihna hriat’ (resourceful) kan tih hi a ni a; a nachang hria, hmangchang hria, te pawh kan ti thei awm e.
Kumin January thla tir khan Buhban khaw nula pawl sawm zirlai chuan Nagpur-ah Mizoram aiawhin India Science Congress-ah a zu tel a; a tel theihna chhan pawh hi, state level inelnaa a project- ‘Study on Generation of plastic waste and its management in Buhban Village, Mizoram’ tih chu project tha bera thlan a nih vang a ni. Plastic bawlhhlawhte hi halral mai lovin mihringin kan hman tangkai theih turin hmanraw chi hrang hrang an siam chhuak a, hei hi Exhibition an neihnaah pawh mipuiin an ngaihven hle a nih kha. Heng plastic chhiate hi thildanga hman tangkai ni ta lo se, bawlhhlawh anga sawngbawlna hautak zet mai hmachhawn a ngai tho tho dawn a ni.
A ngaihna hriat te, a nachang hriat te hi mihring quality, mihring pianken pakhat a nih rualin, kan dinhmun azir zela rawn inlar chhuak a ni duh hle a; chu kan dinhmun pawh chu a tlangpuiin ‘harsatna dinhmun’ a ni chawk bawk.
Covid hripui kan hmachhawn a, harsatna hrang hrangin min han bawh tak tak chuan, kum sawmhnih sawmthum chhunga kan tih theih mang loh pawh kum hnih khat chhungin kan haichhuak thei mai. Tunah chuan Mizo tomato-in Vai tomato a chimral mek ta a nih hi. Harsatna kan tawh hian a lehlamah malsawmna a lo thleng ve thung thin a, chu chu ‘tuarna phena malsawmna (a blessing in disguise) tia sawi a ni thin a. A ngaihna hre tur pawh hian eng emaw harsatna kan han tawh deuh phat phat te pawh a lo ngai thin.
Mizoram pawh hian kawng hrang hrangin harsatna kan tawk mek a, heng harsatnate hi malsawmnaa chantir tumna nena hmachhawn kan thiam a pawimawh dawn khawp mai.