A ngaizawng ta lo deuh riau chein i hria em?

A ngaizawng ta lo deuh riau chein i hria em?
Inngaihzawnnaah hian inthen a hnai tih lo hriat lawk theihna tur signal chi hrang hrang a awm niin relationship lama mithiam ten an sawi. Mahse, a chang chuan he signal hi a chiang lo ve thin. Chuvangin kan ngaihzawng te nena kan inkar boruak a that leh that loh te kan hroat thiam theih nan chung signal fiah lo leh chiang lo tak tak te pawh chu kan hriatthiam a pawimawh ta a ni.
Nang chu a text hmasatu emaw a call hmasatu emawah i tang ngar ngar a nih chuan hman angin a ngai ta lo che tihna a ni a, i laka a rilru pek thin dan te pawh a lo tlahniam tawh. Ani chu a text hmasa leh call hmasa thintu zawk a nih thin a, tunhnaiah nangin i tih hmaak zawk zel a ngai ta a nih chuan in inkar a tha tawk vak lo tih i hrethiam mai dawn nia.
I ngaihzawng chuan a thiante leh chhungte nen a inhmelhriattir che a nih chuan in boruak kha a la thutak tihna a ni a, mahse, a chhungte leh a thiante nen a inhmelhriat tir duh miah lo che a nih chuan chuti takin in inngaihzawnna kha a la thutak lo tihna a ni.
A hmaa i bula sawi tur ngah thei em em thin kha a ngawi chawi ta riauin i hria em? A tawng berah i tang ta zawk a, i thil sawi te a rul tawk lekin a lo chhang ve leh ringawt thin che niin i hre deuh tlat em? Chutiang boruak chu in nei a nih chuan inngaihtuah harh rawh le.
Inkhawih neuh neuh lampang kha a tlem ta riauin i hria em? Inkuah emaw kuta invawn emaw, eng emaw taksa insik hi inngaihzawnna boruak tinghettu pakhat a ni ve thin a, mahse, chutiang chu in pahnih inkarah khan a khât ta riauin i hria em? I kut vawn leh han khawih deuh neuh neuh che kha a ching ta lo thar deuh riau a nih chuan a ngaihven dan che kha a tlahniam tihna a ni.
I text message a chhan let ran dan che pawhin awmzia a nei thuk riau a nia. A hmaa i text reng reng rang taka chhanglet vat vat thin kha a chhanlet hun i nghah vang vang a ngai ta a, a darkar bi te i nghah a ngai ta hial a nih chuan a ngaihven dan kha hman ang a ni ta lo tih hrethiam mai rawh.
Inhmuh leh lenchhuah dun vel pawh a rawttuah i tang ta char char a nih chuan han rawt lo ve deuh chhin la, chhuah dun te a rawt ve em? A rawt chuang lo a nih chuan chuti takin a thlahlel tawh lo che tihna a ni a, in pahniha awm dun loh pawhin hrehawm a ti tawh lo tihna a ni.
I awmdan emaw lan dan emaw kha thlak duh a nei thut em? Entir nan i sam tihdan emaw, i inchei dan emaw te kha a nalh lo tiin, a nalh zawk zawng a inthlak turin a ti che em? Hetiang hi ngaihtha taka en liam mai tur a ni lo.
Body language hi a pawimawh a, kan ngaihzawng te nen chuan kan mitmeng leh awmdan atang ringawt pawhin thil tam tak kan inhrepawh thei a, tawng miah lovin thu tam tak a sawi theih thin. Mahse, a body language a danglam ta thut a, mit intawn deuh sak sak emaw, han inkuah deuh thuak emaw te pawh a awm ta lo a, pumpelh a tum deuh tlat ni a i hriat chuan a ngaihven dan che kha a hma aiin a tlahniam tawh tihna a ni a, herthiam mai ang che.
Han ngaihtuah vang vang la, tunhma angin a ngaiin a thlahlel ta lo riau chea hriatna i neih chuan i hre dik ngei ang. Kan chhia leh tha hriatna fim taka hmanga kan ngaihtuah vang vang a kan ngaihzawng ten min ‘care’ ta vak lo a hriatna kan neih chuan a dik duh hle a ni.