A thiam lo a ni zawk lo maw?

Inngaihzawn leh nupa nun te hi a tluangpurh reng bik lo a, a harsat ve em em chang te pawh a awm thin. Hetianga harsatna kan tawh chang hian kan kawppui te mawhpuh mai kan ching a, mahni thiam lohna leh tlin lohna te chu kan inhmu hleithei thin lo. Khai le, in inkar buainaah hian i kawppui i mawhpuh ringawt hmain mahni inenchiang rawh le. Nangmah kha in inkar tichhetu zawk i lo ni reng mai thei asin! Tun tumah hian relationship lama mithiam ten inngaihzawnna leh nupa nunah a boruak tichhetu zawk kan nih leh nih loh inhriat theihna tur, mahni kan inenfiahna tur hrang hrang an sawite kan rawn tarlang e.
1. In inngaihzawnna emaw nupa nunah emawah rinawm i inti a, i rilru zawng zawng i pe niin i insawi a, mahse, social media lamah i la lerh ru riau a nih chuan in inkar tichhetu zawk i ni thei tlat. Social media lamah inchhaih leh han lerh deuh hi pawi loah kan ngai a ni mai thei a, mahse, kan kawppuite mit tikham tu hi thil tê tham ni a kan ngaih a ni thin. Keinin inchhaih satliah emaw kan tih te hi kawppuite tan rilru nawm loh phahna a ni thei tlat a, hriat loh karah boruak tichhetu a lo ni reng thei.
2. Tu thiam loh pawh ni se in boruak chhiat chang apiangin a chan chhe zawk leh a tuartu zawk angah i inlantir ziah a, i tihsual leh dik loh avanga in boruak in nei deuh a nih pawhin a tuartu zawk angah i inngai tlat zel a nih chuan in inkar tichhetu zawk i nei tlei. Hei hi mahni hmasial vang a ni duh hle a, chubakah hetianga a tuar zawk leh chan chhe zawk anga inlantir kan tum tlat thin hi chuan kawppui/ngaihzawng te kan namnul deuh tihna a ni duh hle a, kan inkar tichhetu a ni thei.
3. Inhnial leh inhauh nikhuaah tawngkam chhe tak hman i ching a, “I â a nih hi!” tih te, “I mawl lutuk,” tih te i ching a nih chuan in inkar tichhetu i ni ngei ang. In inhauh boruak rehin, insawi rem leh mah ula inhauh laia i tawngkam kha hriatchhuah chang a nei fo dawn a, chu chuan tihnat nawn chang a nei ngei ngei dawn a ni.
4. I ngaihzawng/ kawppui chu i ringhlel deuh reng mai em? Ngaihzawng/ kawppui te rinawmna chungchangah i ngaih a tha lo reng a, eng emaw hlekah i ringhlel reng mai a, i puhchhe nghal viau zel mai a nih chuan in inkar tichhetu i ni ang. Hetianga in tawngpawng rinhlelh leh ringawt thin hi a tu zawk tan pawh ninawm chin leh ngaihtheih loh hun a awm ngei ngei thin a, inngaihzawnna leh nupa inkar boruak tihchhiatna awlsam tak a ni.