A thih dawn ruaiah Japan misual inpuang

DNA test hmangin Japanese mi thi mai tawh tur chu Japan a ‘most wanted criminal’ a ni tih finfiah a ni.
Satoshi Kirishima chuan January thla khan police te hnenah inpuangin, “Ka hming dik tak nena thih ka duh a ni” tiin a sawi a.
Officials te chuan kum 70 a upa Kirishima chu kum 1970 chhova militant group Japan hmun hrang hranga bomb rapthlak tak tak tipuaktu a ni tih an finfiah ta a ni.
Japan ram pumah a thlalak tar chei chuai a ni chunga engtianga hriat hauh lova inthup thei nge a nih chu thil mak a tling a.
Kirishima hian homemade bomb siamin chu chuan kum 1970 chho khan Japan capital Tokyo a Ginza district an bomb a ni.
Khatih lai khan East Asia Anti-Japan Armed Front, radical, left-wing organisation member niin Tokyo khawpui hmun hrang hraqnga bomb tipuak thin an ni a. Mitsubishi Heavy Industries building an beihnaah phei chuan mi pariatin nunna chanin hliam tuar 160 chuang an awm a ni.
Bomb tihpuah pali laiah Kirishima chu inhnamhnawiha ngaih niin a thian te pahnih chu man ni thungin thiamloh chantir an nih hnuah tihhlumin an awm thung.
Kirishima chauh chu group member police tena an man loh awm chhun nia ngaih a ni a, Japan ram pumah kum tam tak a thlalak tar chuai chuai a ni chungin manin a awm chuang lo.
A thlalak tar chhuah chuai chuai a ni chungin a chenna bula a thenawm te chuan thla kaltaa a identity pholan a nih hnuah pawh mi damdap mai zu tlem a in hnua a room a guitar play tang tang thin tiin a sawi.
Kirishima hian Hiroshi Uchida tih hming invuahin Tikyo khawthlang lama Fujisawa khawpuiah kum 40 dawn a cheng tawh a ni.
Police te hnena a inpuan dan chuan ni tin inhlawhfaa hun a hman hnuah construction company ah hna hmu in a thawk zui ta tiin a sawi a. A hlawh pawh cash zela la in phone pawh a nei duh lo tiin a sawi.
Driver’s license pawh a nei lo va, health insurance pawh a nei hek lo. Cancer tihdam theihloh a vei hnua damdawi in a pan hnuah chauh hospital staff te hnena a nihna dik tak a sawi hnuah chauh hriatchhuah a ni ta a ni.